P4.5 milyones ukay-ukay gisakmit sa customs

CEBU, Philippines — Gisakmit sa Bureau of Customs-Cebu ang gibanabanang P4.5 milyones nga kantidad sa mga nagkalainlaing biya nga mga sapot sinina o ukay-ukay  gikan sa China nga suway untang ipalusot dinhi sa Sugbo aron ibaligya sa kamerkadohan.

Ang maong 694 ka bandol nga mga “ukay-ukay”  giingong miabot dinhi sa Port of Cebu niadtong Agusto 20, 2020. Base sa nakasuwat sa dokumento niini, ang sud sa mga containers mga hotel supplies kini.

Apan ang pag-import og mga ginamit o biya nga mas naila sa tawag nga “ukay-ukay” dinhi sa nasud kalapasan gyud sa balaod.

Si BOC-Cebu District Collector Atty. Charlito Martin Mendoza miisyu og Warrant of Seizure and Detention (WSD) batok sa maong kargamento human nasakpan nga nakalapas kini sa Republic Act No. 4653.

Ang RA 4653 nagdili sa importasyon og mga ginamit nga mga sinina gikan sa ubang nasud “to safeguard the health of the people and maintain the dignity of the nation.”

Sumala pa sa gi-post sa BOC-Cebu sa ilang Facebook page, ang manifesto sa maong kargamento nag-ingon nga kini gi- consigned sa GRR Trading nga nagbase sa Talisay City, Cebu.

Namatikdan nga kining maong kompanya mao sab ang consignee sa laing kontrabando nga gisakmit sa BOC-Cebu sa miaging mga semana ug adtong tungora tungod sa pag-import og mga sigarilyo gikan gihapon sa China. Sa nakalabay nga kalambigitan sa GRR Trading gisakmit gikan kanila ang mga smuggled cigarettes nga miabot tanan og P234.7 million gikan gihapon sa China.

Ang Bureau’s Action Team Against Smugglers (BATAS) mipasaka na og kaso batok sa GRR Trading tungod sa importasyon sa maong mga sigarilyo. Samtang ang BOC-Cebu  Account Management Office (AMO) mi-revoke na sab sa accreditation isip usa ka importer ang maong kompanya. The Freeman/IBM