DILG nangita og dugang contact tracers

CEBU, Philippines — Ang Department of Interior and Local Government (DILG)-7 mokuha og mga contact tracers aron hingusgan ang contact tracing human nakita nga epektibo kini pagpugong sa pagkuyanap sa novel coronavirus disease (COVID)-2019.

Matud ni DILG-7 Director Leocadio Trovela ang mga contact tracers gitahasan sa pagpahigayon og case interviews, profiling, ug pagpahigayon og initial public health risk assessment sa COVID-19 cases ingon man pagpangita sa mga close contacts sa napositibo sa Covid-19, moabag sa kasamtang contact tracers sa local government units sa Central Visayas . Si Atty. Ian Kenneth Lucero, pangulo sa DILG- Local Government Monitoring and Evaluation Division miingon ang pag-hire og dugang contact tracers makatabang aron masiguro ang tukma ug paspas nga pagsubay sa mga na-exposed sa virus ug mohimo sab og report sa COVID-19 surveillance data.

Ang mga dawatong aplikante kinahanglang nakahuman og medical course o criminology, mahimong duna silay eksperiyensiya sa  paghipos og mga impormasyon o nakaapil og mga research ug nagdokumento.

Kinahanglang andam silang mo-interview sa mga positibo sa Covid ug ilang mga close contacts aron masubay kun asa sila gikan ug makahimo dayon og assessment ug duna sab silay nakamahoan sa paghimo og imbestigasyon. Walay training nga kinahanglang ilang again ug dili kinahanglan nga lisensyado sila sa kursong ilang natapos.

Ang mga interesadong aplikante kinahanglang moduso og Letter of Intent, Personal Data Sheet, National Bureau of Investigation clearance, ug drug test result ug i-email kini sa DILG Provincial/HUC Offices.

Kadtong madawat nga aplikante moserbisyo sulod sa upat ka buwan ug magdawatan og P18,784.00 nga binuwang sweldo.Alang sa dugang pangutana mahimong makapadala og mensahe sa official Facebook page sa DILG VII. /IBM (BANATNEWS)