Fiesta sa Sta. Teresa de Avila mahimong simple
CEBU, Philippines — Hayan simple na lang ang pagsaulog sa kapistahan sa simbahan sa Sta. Teresa de Avila diha sa Dakbayan sa Talisay karong sunod buwan.
Kini gumikan sa mga lagda nga hugot nga gipatuman sa gobyerno nunot sa nasinati nga COVID-19 pandemic.
Nasayran gisugdan na sa pagtuki sa kadagkuan sa kapolisan ingon man sa simbahan ang ilang posibleng kalihukan alang sa nagsingabot nga fiesta.
Si Police Executive Master Sergeant Leoven Sebomit sa Talisay City Police Station nagkanayon nga wala pa sila makakab-ot ug tukma nga desisyon nga himoon sa kadagkuan sa simbahan.
Kahinumduman naandan sa Siyudad sa Talisay nga alegre ang pagsaulog sa kapistahan ni Sta. Teresa de Avila, gani karon pa lang buwana aduna na unta silay matag adlaw og gabii nga kalihukan.
Apan gumikan sa nasinati nga pandemiya nagtuo si Sebomit nga daku na kini og kausaban. Hinuon gipasalig sa kapolisan nga aduna silay igong pwersa kun ugaling gikinahanglan. /MEL (BANATNEWS)
- Latest