300 ka boatmen sa olango gipa-ubos sa swab test

CEBU, Philippines — Gipa-ubos sa swab test ang 300 ka mga boatmen sa Isla sa Olango nunot sa pagbukas na sa turismo sa Dakbayan sa Lapu-Lapu.

Kini sa tuyo nga luwas ang mga dumoduong og langyaw nga turista nga mobisita sa nagkalain-laing dapit sa maong siyudad.

Suma pa ni Mayor Junard Chan nga ang mga masuta nga negatibo sa swab test hatagan og special permit alang sa pagpadayon sa ilang operasyon.

Ang mag positibo sa test adto ipahiluna sa isolation facility nga gitagana sa lokal nga kagamhanan.

Samtang gikahinangop usab ni Police Colonel Clarito Baja ang direktor sa kapolisan sa Lapu-Lapu City Police Office LLCPO ang ilang nadawat nga mga kahimanan gikan sa siyudad.

Kini naglakip sa 179 ka mga bulletproof vest ug unom ka mga scuba diving equipment.

Si Mayor Chan kinsa maoy nangu sa pag-turn over sa maong mga kahimanan miingon nga gikinahanglan kaayo niya ang tabang sa kapolisan karon nga nibukas na ang turismo.

"Mangayo ta og abag sa kapolisan nga open na nato ang atong tourism industry," suma ni Mayor Chan.

Si Police Colonel Baja sa iyang pamahayag miingon nga ang mga beach resort ug kadagatan sa dakbayan mao gayod ang major attraction nga makaaghat sa island hopping trip nga pagahimoon sa mobisita nga mga langyaw. /MEL (BANATNEWS)