Pangu sa OSCA sa Talisay wa mapulihi

CEBU, Philippines — Pabilin gihapon nga bakanti ang posisyon sa pagkapangu sa Office of the Senior Citizen (OSCA) sa Dakbayan sa Talisay.

Kini maoy gitug-an ni Amy Kiamko, kinsa maoy presidente sa Senior Citizen Federation.

Matud pa niya nga sukad namatay si Nick Hermosa niadtong 2018 wa na gyud kini mapulihi og wa usay napahigayon nga piniliay sa maong buhatan.

Hinuon ang matag organisasyon sa senior citizen sa matag barangay pabilin ra nga nag-serbisyo sa katiguwangan.

Apan base sa kasaligan nga tinubdan giingong adunay naglihok karon nga tawo sa usaka politiko nga naghinay-hinay sa paghimo og iyang grupo sa mga senior citizen aron maoy motuboy kaniya sa maong posisyon.

“Gusto man gud nila nga ilang kuptan ang organisasyon sa senior, posible pangandam sa umaabot nga piniliay,” asoy pa sa maong tinubdan nga dili magpahingan.

Adunay pangalan nga gibutyag apan gipugngan lang una samtang gipaabot ang iyang pamahayag.

Si Kiamko nanghinaut nga unta mahunong na ang pamolitika sa buhatan sa OSCA aron dili maapektuhan ang ilang mga myembro. /MEL (BANATNEWS)