Census nagsugod na diha sa Mandaue
CEBU, Philippines — Nagsugod na ang mga enumerator sa Philippine Statistics Authority (PSA) nga nadistino sa Dakbayan sa Mandaue alang sa 25 ka adlaw nilang trabaho pagsuroy sa kabalayan sa 27 ka barangay sa maong siyudad.
Kini isip kabahin sa national census on population and household.
Gisugdan nila niadtong Septiyembre 3,2020 ang pagbisita sa mga panimalay sa tibuok dapit sa mga barangay sa dakbayan taliwala sa padayong hulga sa coronavirus disease.
Suma pa ni Vic Suliva nga maoy census area supervisor sa Dakbayan sa Mandaue nga ma-binantayon sila sa pagtuman sa ilang kaakohan pinaagi sa pagsul-ob og face mask, pagdala og alcohol, ug pagsiguro nga magtamod sila sa social distancing.
Gipasabot ni Suliva nga importante kaayo ang pagkuha og mga detalye kabahin sa mga nagpuyo sa matag panimalay alang sa national census, hinoon siya miingon nga makasabot ra sila mga tawo nga magpanagana sa pag-atubang kanila nunot sa nasinati nga pandemiya.
Nakig-alayon usab ang mga sakop sa PSA ngadto sa mga barangay officials sa wa pa sila mosuroy sa kabalayan.
Una nini ang PSA nanawagan sa publiko nga suportahan ang gihimo sa ilang mga enumerator nga mobisita sa kabalayan aron mapahigayon ang national census. /MEL (BANATNEWS)
- Latest