Mga pasahero malaumon nga mobalik na ang PUJ
CEBU, Philippines — Naglaum ang mga pasahero gikan sa Dakbayan sa Mandaue ug Lapu-Lapu nga mobalik na ang pagbiyahe sa mga traditional public utility jeepney.
Kini gumikan sa nasinati nilang kalisdanan sa pagsakay diin kuwang kaayo ang mga sakyanan nga mobiyahe paingon sa maong dakbayan.
Si Jayson Bentulan, 37 anyos nga nagtrabaho sa usa ka mall sa Dakbayan sa Mandaue miingon nga tungod sa kakuwang sa nagbiyahe nga sakyanan sa Mandaue mag-antos sila sa taas kaayong linya.
Gitataw niya nga molungtad gyud og duha ka oras kapin ang ilang pagpaabot og sakyanan sayo sa buntag samtang paingon na sila motrabaho.
Samtang si Rosemarie Lllanes, 31 anyos nga sales lady sa usa ka supermarket sa Dakbayan sa Sugbo miingon nga kuwang gyud kaayo ang mga sakyanan nga maoy hinungdan nga naglisod gyud siya pagsakay sa pagpauli ug paingon sa pagtambong sa iyang trabaho.
Si Marina Amoro, 45 anyos nga taga Barangay Basak sa Dakbayan sa Lapu-Lapu miingon nga ang iyang bana nga usa ka PUJ driver gibati na og kalaay sa pag-paabot kanus-a makabalik sa pagpamasahero.
Sa nasayran giplanohan na sa Land Transportation Franchising and Regulatory Board (LTFRB) 7 nga tugtan na ang mga traditional nga jeep nga makabalik, apan way labot ang Dakbayan sa Mandaue og Cebu City.
Hinuon mipasalig ang LTFRB nga mo-depoly ug dugang mga public utility vehicles sa mosunod nga mga adlaw aron matubag ang suliran sa kakuwang sa mga pampublikong sakynanan. /MEL (BANATNEWS)
- Latest