P1.3 milyones shabu nasakmit sa drug operation

CEBU, Philippines — Wala kaugpo sa Station Drug Enforcement Unit sa Abella Police Station ang usa ka lalaking nadakpan sa buybust operation niadtong Domingo sa gabii diha sa Osmeña Blvd. Brgy. Sambag 2 sa Dakbayan sa Sugbo ug nakuhaan P1.3 milyon nga kantidad sa gidudahang shabu.

Matud pa  ni Police Major Elisandro Quijano, hepe sa Abellana Police Station ang suspetsado makabaligya  25 gramo nga shabu matag semana.

“Listed ni siya, gi monitor na ni siya daan, sumpay ni siya atong dakop sa CIB (City Intelligence Branch) kay same man ang putos niya nga naa sa ice water,” matud ni Quijano.

 Sa pagkakaron, giingon ni Quijano nga balikan nila ang background ni Babatid aron masubay kung adunay pa siya mga kauban sa pagpamaligya sa iligal nga droga aron  mapailalom kini sa ilang follow-up nga operasyon.

Si Babatid miug-an nga kapin duha ka semana na siyang nibalik pagpamaligya niini ug gisweldohan lang sila og P3 mil kada semana sa iyang agalon nga naa sa prisohan karon.

“Wala nakoy choice kay wala man koy trabaho ako nalang dawaton ang tanan kay nisulod man ko ani nga illegal nga negusyo,” sigon ni Babatid.

Samtang nadakpan sab sa kapolisan Pari-an Police Station diha sa Sitio Ibabao Proper, Barangay Mambaling sa samang adlaw si Annabelle Gonzales, 44, nga giingong HVI.

Ang operasyon gipangulohan sa hepe sa Parian Police Station Police Capt. Armando Labora nga niresulta sa pagkasakmit sa 41 gramos nga gidudahang shabu.

Sa pikas bahin, usa ka kanhi uyab og polis nga nalambigit sa illegal nga drugas ang nadakpan sa gihimo nga buy bust operation didto sa Sitio Kamonggay, Barangay Dumlog, Dakbayan sa Talisay kagahapon sa kaadlawon.

Ang nasikop mao si Sheena Nacario Echavez, 33, taga Sitio Colis, Brgy. Tabunok sa maong siyudad. Nadakpan sab iyang kakunsabo nga si Mark Uy Basnillo, 40.

Ang mga sakop sa Provincial Drug Enfrocement Unit (PDEU) ug sa kapulisan sa siyudad  maoy nagbuhat sa operasyon ug nakuhaan kini og 25 gramos nga gidudahang shabu.

Si Echavez giingong uyab kaniadto sa usa ka polis nga nalambigit sa illegal nga drugas nga napatay sa mga kaubang polis human kini nakigpinusilay sa mga polis nga modakop unta kaniya niadtong tuig 2016 sa Dakbayan sa Naga.

Si Echavez aduna karoy karelasyong nalambigit sa illegal nga drugas nga kasamtangang natanggong sa prisohan.  – Romeo D. Marantal, Rowena Capistrano, Gabriel Bonjoc/IBM (BANATNEWS)