Probinsiya nipaimbestigar sa puting bas nga giabuno sa Manila Bay
CEBU, Philippines — Gipaimbestigahan karon sa Probinsiya sa Sugbo aron masayran kong asa nga lungsod sa probinsiya naggikan ang mga puting bas nga giabuno ngadto sa Manila Bay.
Kini human nga si DENR Undersecretary for Solid Waste Management and Local Government Units Concerns Benny Antiporda nagkanayon nga ang maong mga bas gipino na kini diin dolomite boulders kini gikan sa Sugbo.
Si Bokal John Ismael Borgonia, chairman sa Committee on Environmental Conservation sa provincial board nagkanayon nga sa balita lang usab sila nasayod nga naggikan kini sa Sugbo tungod kay wala may niagi sa probinsiya o sa iyang buhatan nga nangayo og permit.
Si Borgonia nagkanayon alarming kini kon ugaling tinuod nga gikan sa Probinsiya sa Sugbo naggikan ang mga bas hilabina nga wala sila masayod kalabot sa pagkuha sa maong dolomites.
Matd ni Borgonia nga kong ugaling ang national government ang nahimo niini angayan gihapon nga pahibaw-on ang probinsiya ug ang Local Government Unit (LGU) nga hingtungdan hilabina nga gisuspenso ang pag-isyu og quarry permit sa Probinsiya sa Sugbo.
Ang mga lungsod sa Dalaguete ug Alcoy adunay mga dolomite rock ug sa maong mga lugar adunay makina usab nga mopino sa maong klase sa bato.
Sa laing bahin, si Konsehal Joel Garganera, deputy chief implementer sa emergency operation center makigtagbo sa kadagkoan sa Department of Environment and Natural Resources (DENR)-7 karong adlawa aron tukion ang giingong mga puti nga bas nga gikan sa Sugbo nga giabuno ngadto sa Manila Bay.
Matud ni Garganera nga wala pa makahatag niya og dugang detalye ang direktor sa DENR-7 sanglit nanghipos pa usab kini og impormasyon tungod kay ang ilang ahensiya walay port permit nga giluwatan kabahin sa pagbiyahe sa maong mga bas gawas sa Sugbo.
Dugang ni Garganera nga lakip sa ilang tukion uban sa mga kadagkoan sa DENR mao ang giingong quarry sa mga barangay sa Agsungot ug Poblacion Pardo. Rowena D. Capistrano/BDB (BANATNEWS)
- Latest