Kisaw sa politika sa Talisay misugod na
CEBU, Philippines — Misugod na og kisaw ang politika sa Dakbayan sa Talisay human namatikdan ang kanunay nga pagkuyog ni Mayor Gerald Anthony “Samsam” Gullas Jr. ug ni Bise Mayor Alan Bucao sud sa pipila ka adlaw.
Una niini dunay mitumaw nga hungihong nga mag atbang na unya sa piniliay ang duha ka mga opisyal.
Nabantayan nga nag-uban si Mayor Gullas ug Bise Mayor Bucao nga nakigtigom sa mga kapitan sa 22 ka barangay niadtong miaging adlaw.
Una na usab nga gihimakak sa duha ka opisyal nga dili na maayo ang ilang relasyon.
Gitataw ni Bucao nga dili na bag-o alang kaniya ang mga isyu tungod kay normal ra kini sa politika.
Matud pa niya nga sa ka solid sa Pundok Alayon wala sila maghuna-huna og politika ug tinud-anay nga serbisyo ang ilang gi-una labi na sa panahon karon.
Sa iyang bahin, si Gullas nagkanayon nga regular nga tigom lang sa mga kapitan ang nahitabo ug na atol nga nagkakuyog sila ni Bucao ug sa mga konsehales.
Asoy pa niya nga adunay panagtigom nga ilang gihimo sa konseho sa wala pa ang tigom sa mga kapitan. /MEL (BANATNEWS)
- Latest