Senior citizen naalaang asset sa polis gipusil patay
CEBU, Philippines — Patay ang usa ka 60-anyos nga babaye human kini pusila sa duha ka lalaki kagahapon sa hapon diha sa Chinese Cemetery sa Barangay Carreta, Dakbayan sa Sugbo.
Ang biktima giila sa kapolisan nga si Emelia Ramos Misa, nagpuyo sa maong dapit, nakaangkon kini og tulo ka samad pinusilan sa iyang dughan nga hinungdan sa iyang kamatayon.
Gikataho nga si Misa tanod kini kaniadto diha sa nahisgutang barangay apan niretiro na kini tungod sa iyang pangedaron ug naalaan nga asset sa kapolisan.
Ang mga kriminal daling nibiya sa lugar human sa hitabo ug padayon pa kining gipangita sa kapolisan.
Gikataho usab nga si Misa ang gipasanginlan sa mga ilegalista nga maoy mosumbong ngadto sa mga polis kong adunay mahitabong pagpangronda batok sa ilegal nga drugas diha sa ilang lugar.
Matud ni Police Staff Sergeant Roy Bacus, imbestigador sa Mabolo Police Station nga sa wala pa mahitabo ang insidente nagbarog si Misa diha sa maong dapit dihang kalit lang nitungha ang duha ka lalaki ug dayong pusil ngadto sa biktima.
Dugang pa ni Bacus nga ang biktima gialaan nga asset sa kapolisan ug gituohang hinungdan nga gipusil kini.
Na-recover diha sa lugar nga nahitaboan ang tulo ka kabhang sa kalibre .45 nga pistola. / BDB (BANATNEWS)
- Latest
