Mandaue nangandam na sa pagbukas sa klase
CEBU, Philippines — Hingpit nga gipangandaman sa lokal nga kagamhanan sa Dakbayan sa Mandaue ang gikatakdang pagbukas sa klase sa Oktubre, 2020 pinaagi sa paghinayhinay na og bakante sa mga lawak sa publikong mga tulunghaan sa dakbayan nga gigamit nga mga isolation facility.
Kini maoy tipik sa pamahayag ni Mayor Jonas Cortes atol sa iyang State of the City Address (SOCA) sa ika-51st nga charter day sa siyudad niadtong Domingo nga gi-post diha sa facebook page sa public information office (PIO).
Matud ni Cortes nga nagpadayon usab ang decontamination sa maong mga tulunghaan ug ingon man ang kaugmaran sa duha ka bag-ong isolation facility nga naglakip sa Cebu North Bus Terminal sa Barangay Subangdaku ug ang pribado nga Norkis Park diha sa dalan Plaridel sa Barangay Looc.
Gilakbit usab ni Cortes ang kabahin sa mga lakang sa pakigbatok sa COVID-19 diin ubay-ubay na ang naka-recover.
Si Cortest nagkanayon nga anaa na lang sa 225 o 10.7 porsiyento sa kinatibuk-ang gidaghanon gikan sa 2,095 ka kompirmadong kaso sa COVID-19. Sa maong gidaghanon sa kaso 1,778 niini ang naka-recover ug 92 ang namatay. “We are hopeful with these results as we continue to foster cooperation with private stakeholders and the community. We learn from our stumbles and we learn from others. Today, our fight against COVID-19 is more streamlined”, matud ni Cortes. /BDB (BANATNEWS)
- Latest