Facemask, face shields, PPEs ipahipos og tarong

CEBU, Philippines — Tungod sa peligro sa pagtakod sa novel coronavirus disease sa publiko ilabi na sa mga tigkolekta sa mga basura, ginadili na ang pagpataka og labay sa mga facemask ug mga gipanggamit kontra COVID-19.

Si Cebu City Councilor Alvin Dizon miingon nga usa ka ordinansa ang iyang umolon aron magdili ug magsilot sa mga tawong magpataka og labay sa ilang ginamit nga face masks ug ubang mga gamit alang pakigbatok sa COVID-19 sama sa personal protective equipment ug uban pa.

"The reckless disposal of COVID-19 protective gears and products, particularly potentially infectious face masks, poses a threat to human health and environment and goes against the efforts of the government to clean up the city," sumala pa sa ordinansahon nga tukion sa regular session sa konseho karong Miyerkules.

Apil sa nalatid sa ordinansa ang paghatag og kasayuran sa publiko bahin sa ilang panglawas ug responsibilidad sa mga tawo sa kinaiyahan.

Nalakip sa mga dili ipataka og labay mao ang tanang klase sa face masks, face shields, hand gloves ug uban pang personal protective equipment (PPE), ingon man mga disinfectant ug hygiene products sama sa wipes, tisyu, rubbing alcohol ug hand sanitizers.

"The use of face masks made of organic or recyclable materials or even indigenous materials is hereby encouraged to emphasize that effective waste management is primarily avoidance on the use of disposable materials that are single-used and can hardly be recycled," mabasa ubos sa Seksyon 5.

Ang tanan nga gigamit nga face masks kinahanglan trataron kini nga "hazardous" ug "contaminated waste" ug kinahanglang tarungon ang paghipos niini. Ang makalapas niini makamulta og P1,000 sa unang kalapasan; P2,000, ikaduhang kalapasan; ug P3,000, ug pagkabilanggo og usa ka bulan o depende sa korte sa ikatulong kalapasan.

Kung ang makalapas usa ka juridical entity o mga kompanya, establisamento o organiasyon, silot pamultahon og P2,000 sa unang kalapasan; P3,000, ikaduhang kalapasan; ug P5,000 ug pagbawi sa business permit, ikatulo ug sunod pa nga kalapasan. Mahimong magamit ang out- of-court compromise fee nga nagkantidad og P500 ug magamit lang kini sa mga first time individual violators.

Kung ang makalapas dili makabayad sa compromise fee, siya kinahanglan maghimo og community service sama sa gilatid sa Cebu City Environment and Natural Resources Office (CCENRO) ug/o Cebu City Solid Waste Management Board.

Ang CCENRO maoy gitahasan sa pagpatuman sa maong ordinansa. /IBM (BANATNEWS)