Walo ka durugista sa Cebu City ug Lapu-Lapu City nasikop

CEBU, Philippines — Usa ka kanhi tourist driver ang nasikop sa joint buy bust operation sa Philippine Drug Enforcement Agency (PDEA)-7 ug Regional Police Drug Enforcement Unit niadtong Huwebes sa hapon diha sa Barangay Kasambagan, Dakbayan sa Sugbo.

Ang maong operasyon gipangulohan ni PDEA-7 Director Levi Ortiz ug ug Police Captain Romeo Caacoy, hepe sa RPDEU.

Ang suspetsado mao si Nel Sidra Mayor alias “Proktoy”, 46-anyos, residente sa maong dapit ug gikonsiderar nga high value target (HVT).

Si Ortiz nibutyag nga nakadawat sila og report kabahin sa ilegal nga kalihukan ni Mayor. Si Mayor nasakmitan kini og mga pinutos nga shabu nga nitimbang tanan ngadto sa 500 gramos ug nagkantidad ngdto sa P3.4 milyones.

Sa laing bahin, pito ka drug pusher ang nasikop atol sa managkalahing buy bust operation sa kapolisan sa  Lapu-Lapu City Police Office (LLCPO) niadtong Huwebes sa gabii diha sa Barangay  Kalawisan ug  Barangay Pajo  sa maong siyudad.

Si Police Captain Airbert Jay Sayson sa City Intelligence Branch (CIB) niila sa ilang mga nadakpan nga mao sila si Benjie Romano, 37; Darrel Mercadero, 32; Dindo Barrientos, 37, pulos taga Barangay  Kalawisan; Marcelino Padayao, 51, taga Barangay Babag  sa Dakbayan  sa Lapu-Lapu.

Ang mga suspetsado nasakmitan kini og P500 nga buy-bust money, mga pakete  sa shabu nga nitimbang tanan ngadto sa 0.52  gramos ug nagkantidad ngadto sa P3,536.

Samtang sa Barangay Pajo nasikop si Novamie Pitao, 21; Lieza Llagono, 30; ug Lee Mackie Legaspi, 28, pulos residente sa maong dapit.

Nasakmit gikan kanila ang 5.5 gramo nga shabu nga nagkatidad ngadto sa P34, 472.  Romeo T. Limpangog/BDB (BANATNEWS)