Pasayloa kami sa inyong sala

Giakusahan ang Pilipinas nga nakalapas sa seguridad ug soberentiya sa Tsina kay nagpadala kuno ang Pilipinas og mga military aircraft sa West Philippine Sea, habig sa South China Sea nga sulod sa exclusive economic zone sa Pilipinas. Tataw nga bugal-bugal ang pasangil sa China kay sila man ang nakalapas sa soberentiya sa Pilipinas. Apan bisan pa, buot gihapon sa administrasyon nga ipaagi lang sa diplomasya ang pagresolbar sa isyu.  Kon mag-atubang na ang mga representante sa matag nasud kabahin niini, hayan moingon unya ang representante sa Pilipinas nga, “China, pasayloa ‘mi sa inyong sala, ha!’. Pagkatoytoy!

Wa’y lalis kay wa’y pulis

Adunay pundok sa mga abogado nga gihinganlan og “Tagapagtanggol ng Watawat” ang nag-awhag nga ipadakop kadtong mga tawo nga nanawagan alang sa pagtukod og usa ka revolutionary government.  Apan matud pa ni AFP Southern Luzon Commander Lt. Gen. Antonio Parlade, Jr., kabahin lang sa kagawasan sa pagpadayag ang gibuhat sa maong pundok mao nga dili sila angay arestohon.  Kining managlahi nga baruganan, makapahinumdum kanako sa paagi sa mga bata pagresolbar kon dunay panagbingkil pinaagi sa pag-ingon, “Way lalis kay way pulis”.  Baya no!

Nahimo’ng ‘gollum’ sa gahom

Matud ni Justice Secretary Menardo Guevarra, nagtuo si Presidente Duterte nga angayan na moluwat sa iyang katungdanan ang pangulo sa PhilHealth nga si Ricardo Morales. Sukwahi kini sa gipamulong kanhi ni Secretary Roque nga dili palagpoton sa Presidente ang pangulo sa PhilHeatlh kon dili mapamatud-an ang pasangil sa korapsyon batok kaniya.  Dili na unta maglangay ang hingtungdan sa pagbiya sa katungdanan.  Ang makabungog nga awhag sa katawhan, kinsa maoy tinubdan sa tanang gahom nga ilang gihuptan, mao unta ang ilang langdaman.  Daghan ang nahimong “Gollum” tungod sa gahom.  Saoonz!

Gisakit sa buhing pilato

Miping-it ang mga motorista ni’ng pagpatuman sa kagamhanan sa bag-ong lagda sa pagpasul-ob sa “full-face helmet” tungod kay dugang na usab kini nga galastohan taliwala sa kalisod atol sa pandemic.  Human sa pagpagamit sa barrier nga karon gisalindot ra usab dayon, lain na pud kini nga kamanduan nga daw naghulagway sa kahaguka sa plano sa kagamhanan.  Ang kakulang sa plano sa kagamhanan dili unta mahimong emerhensya ngadto sa katawhan.  Ni’ng bag-ong kamanduan, sama ra nga “Gisakit sa Buhing Pilato ang katawhan”.  Madahaan!

Soloha ang bakuna

Human namahayag si Presidente Duterte nga siya ang unang moboluntaryo sa pagsuway kon aduna na unya’y bakuna batok sa COVID-19, mibalitok siya karon og namahayag nga andam siya magpaulahi aron lang maseguro nga mahatagan ug prayoridad ang mga kabos. Tungod sa kasinatian sa Dengvaxia, wala hangopa sa katawhan ang laraw nga sa bakuna sila’y una’ng dapatan.  Daw aduna’y lagda nga gituman ang kabos natong kaigsoonan nga nagkanayon: “Kon ayuda pinansiyal, among linyahan; kon bakuna, among lihayan”.  Fezteleern!