Human sa pagpamomba sa Jolo, Sulu

CEBU, Philippines — Nagtagbo ang kapolisan sa Dakbayan sa Talisay ug kadagkuan sa Muslim community sa siyudad diin gihisgutan ang maayong relasyon ug pagtinabangay.

Matud sa hepe sa kapolisan sa siyudad, Police Major Gerard Ace Pelare, nga makatulo na ka higayon nga kini ilang gibuhat aron malikayan ang mga dautang tawo nga nagplano sa kalautan sa kadaghanan.

Ang panagtagbo may kalabutan sa pagpamomba sa Jolo, Sulu diin 15 ka tawo ang namatay.

Matud ni Pelare nga dili siya makatugot nga malutsan sa dautang elemento.

Iyang gihangyo ang mga lider sa Muslim community nga mopahibawo dayun kanila kung adunay mga bag-ong nawong sa ilang lugar.

Red alert

Gimanduan ni Police Regional Office 7 Director Albert Ignatius Ferro ang tanang hepe sa kapolisan nga bantayan ang tanang critical infrastructures sa ilang tagsa-tagsa ka area of responsibility.

Kini naglakip sa mga terminal, seaports ug airports human sa nahitabong pagpamomba sa Jolo, Sulu.

Tungod sa maong pagpamomba, ang PRO-7 ubos karon sa red alert.

Bisan layo ra ang Jolo, Sulu, ang kagamhanan sa Siyudad sa Sugbo nakig-alayon sa kapolisan alang sa hugot nga pagbantay sa seguridad.

Matud ni Cebu City Mayor Edgardo Labella atol sa ilang panaghinabi ni Cebu City Police Office Director Josefino Ligan nga ang maong panghitabo mahimong motumaw bisan asa. Nagkanayon sab si Labella nga mangayo og tabang ang kagamhanan sa siyudad sa Muslim community aron moabag kanila.

Si Ligan nimando na sa iyang mga station commanders sa Police Station 11 ug Police Station 7 nga makig-alayon sa Muslim community  aron pangayoan sa ilang kooperasyond diin dunay diyalogo nga himoon aron maseguro nga ang nahitabo sa Jolo dili mahitabo sa Dakbayan sa Sugbo.

“The checkpoints are still there, control points are still there, those are our preventive measures that are taken, including the critical infrastructure will be coordinating with them with the security officers, the regular conduct of patrolling of do’s and don’ts also,” matud ni Ligan.

Si Ligan nihangyo sab sa publiko nga mosabot sa mas istriktong checkpoint procedure nga ilang buhaton tungod kay dili sila katugot nga ang susamang panghitabo motumaw sa Siyudad sa Sugbo. Rowena D. Capistrano, Decemay P. Padilla/GMR (BANATNEWS)