70 porsiyento sa COVID-19 dedicated beds wa pa magamit

CEBU, Philippines — Samtang nagkaubos na ang gidaghanon sa mga bag-ong kaso sa novel coronavirus disease sa Central Visayas ang Cebu City mipahibalo nga 70 porsiyento pa sa Covid-19 dedicated beds sa mga pampubliko ug pribadong hospital sa dakbayan ang wala magamit.

Sa virtual press briefing sa pangulo sa Cebu City Legal Office ug tigpamaba ni Mayor Edgardo Labella nga si Atty. Rey Gealon, siya miingon nga  23 porsiyento ra sa giandam nga mga higdaanan para sa mga pasyenteng dunay Covid-19 ang nagamit sa pagkakaron.

Matud ni Gealon kaning paspas nga pagpagpangita ug pagbuwag dayon sa mga gidudahan nga na-exposed sa mga nagpositibo sa maong sakit maoy usa sa hinungdan nga nimenus ang lapad nga tinakdanay.

Nakadugang sab niini ang pagdala sa mga Covid-19 patients nga adunay mild ug moderate symptoms ngadto sa mga isolation ug quarantine facilities nakatabang aron dili mapuno ang mga tambalanan.

Si Gealon, nitug-an nga niadtong nilabay nga buwan sa Hulyo ang occupancy rate sa Covid-19 dedicated beds sa public ug private hospitals miabot sa critical level tungod sa pagdaghan sa mga nataptan. Nianang buwana gibansagan ang Cebu City nga epicenter of Covid-19 human niini gilabwan ang Metro Manila sa gidaghanon sa mga kaso ug nabutang sa peligro ang healthcare system niini.

Ang tigpamaba sa Department of Healtha 7 Dr. Mary Jane Loreche, niawhag sa mga tambalanan nga bisan ug nikubos ang gidaghanon sa kaso sa Covid-19 sa rehiyon karon, mas maayong ipabilin gihapon  kining mga Covid-19 dedicated beds ug personnel.

Matud niya panagana kini  ilabi adunay mga lugar nga mas luag na ang ilang quarantine nga protocols human sila gipaubos nalang sa general community quarantine ug modified GCQ. /IBM (BANATNEWS)