Ang pan sa kinabuhi ni Father

Inay magsige ta og tan-aw sa mga bati ug makapa stress nga kasayoran, atong iliwag ang mga mata sa mga maayong butang nga gipanghimo sa atong mga kaigsoonan nga maoy maghatag og positibong panglantaw nato ilabi na niining panahon karon sa problema.

Sama nalang niining sugilanon sa pari'ng SVD nga si Father Vencent Bahian, wrong spelling ang iyang first name alang sa tanan apan mao kining nakapatik nga sakto sa iyang pagkatawo nga nabutang sa iyang birth certificate.

Siya ang naa sa likod niining programa nga Bread for Life for the Pandemic diin literal gyud nga siya ang nag-bake sa pan nga iyang gipang –apod-apod sa mga tawo nga walay mga pinuy-anan o mga tawo nga anaa lang sa karsada nagpuyo.

Gamay’ng background sa kinabuhi ni Father Vencent, gikan siya sa kabus nga pamilya ug nag-working student sa usa ka bakery didto sa Mindanao kaniadto aron makalampos sa iyang pagtuon hangtod nga nahimong pari.

Ang iyang kasinatian isip baker ang nagamit niya karon sa pagpalapad sa iyang bokasyon dili lang sa pagkaong pang espiritohanon kondili sa pagkaon sa lawas sa mga tawo.

Si Padre didto diay na-assign sa Germany diin naordinahan sa iyang pagka pari ug mipauli kadyot sa nasud. Gikatakdang mobalik siya sa Germany pero naabtan sa pandemiya ug wala na kalarga. Sa sinugdanan, hobby lang niya ang baking nga iyang gipatilaw sa mga kaubang paring SVD  sa ilang giestaran sa University of San Carlos. Ug sa kadugayan  nahunahunaan niya nga ipaambit sa mga kabus ang iyang pan.

Tungod kay daghan mga tawo nga naghatag og mga ingredients sa pag-bake og pan, iya kining gihatagan og katumanan, manomano ang iyang pagmasa sa harina hangtod na sa tanang proseso ngadto sa oven hangtod sa paghaon. Kaabag niya ang mga kaubang pari ug napaabot gyud nila ang ilang pag alagad sa mga tawong gipanggutom karon, mao na kini ang ilang gihimo ang pagpakaon sa mga gigutom.

Gipalabi nila kadtong mga bata ug mga ginikanan nga wala makadawat og ayuda sa gobiyerno, kutob sa ilang makit-an nga daplin sa karsda nga naglarawan sa kagutom ilang giatiman. Ang pagka stranded ni Father Vencent duna diay tumong nga mao ang paghatag og kabusganan sa mga tawong nagkinahanglan dili lang sa spiritual need kon dili sa ilang tiyan.

Dili mahimo sa pari ang iyang adbokasiya kon wala ang suporta sa iyang mga kaubang pari, ug sa mga tawong nagpakabana, dinhi nato makita nga kon magkahiusa lang diay bahalag ginagmay makahatag na kalipay sa mga tawo. Unta aduna pay daghang mga alagad sa simbahan o bisan kinsa nga mohimo sa samang pagpakabana ngadto sa mga tawo nga daw nataligam-an nalang tungod lang sa ilang kahimtang.

 Mabuhi ka, Padre! Wrong spelling man imong ngalan apan labaw pa sa sakto ang imong gihimo sa imong isig ka tawo.