Kong. Lagon gituboy sa mga kapitan sa Cordova

CEBU, Philippines — Minus duha ka tuig pa sa dili pa ang eleksiyon sa 2022 apan ang tanang 13 ka barangay kapitan sa Lungsod sa Cordova ang nituboy na kang Kongresista Sonny Lagon sa Ako Bisaya Partylist sa pagka-kongresista sa ikaunom nga distrito sa Lalawigan sa Sugbo.

Natigayon ang pagtuboy kang Lagon atol sa panagtapok sa mga kapitan nga gipangulohan sa ni Association of Barangay Councils president Francisco Ando sa panimalay ni Lagon sa Barangay Tilhaong, Lungsod sa Consolacion niadtong Sabado.

Ang Cordova ug Consolacion mao nalang ang duha ka lungsod nga naglangkub sa distrito human nabuwag ang Dakbayan sa Mandaue isip nag-inusara nga distrito nga kasamtangang girepresentahan ni Kong. Emmarie “Lolypop” Ouano-Dizon.

Si Ouano-Dizon tataw nga magpapili sa maong posisyon sa Mandaue City Lone District isip lumad nga molupyo samtang dunay hugon-hugon nga si kanhi mayor, Consolacion Vice Mayor Teresa Alegado, ug kanhi former mayor, Presidential Adviser on Legislative Affairs, Secretary Adelino Sitoy, interesado nga magpapili sa pagka-kongresista sa ikaunom nga distrito.

Matud ni Ando nga wala pa nasayud si Sitoy sa ilang desisyon pagtuboy kang Lagon o kaha ilang hangyuon nga mopahuway nalang tungod sa pangedaron niini nga 85-anyos.

Si Catarman Barangay Kapitan Alejandro Aro nipasabot nga atol sa birthday sa anal ni Sitoy nga si Cordova Mayor Mary Therese Sitoy-Cho niadtong Hunyo 20 nitambong si Lagon ug didto nahisgutan ang plano niini.

“Mao gyud sad ang gusto ni Mayor nga si Cong. Sonny ang modagan pagka-congressman, iya hangyoon iya papa. Mo-support mi ni Mayor,” matud ni Aro.

Si Pilipog Barangay Kapitan Anabelle Baraquia nitataw nga sirado na ang ilang desisyon alang kang Lagon.

“Amo unta nga magkahiusa lang sila si Noy Ade ug Cong. Sonny,” matud niya.

Si Bangbang Barangay Kapitan Dionesio Sumagang Jr. niingon sab nga bisan modagan pa si Sitoy, adto na gyud sila suporta kang Lagon kinsa iya gihulagway nga dili traditional politician ug aktibo.

Si Dapitan Barangay Kapitan Baby Villaspin nidugang nga ang ilang suporta kang Lagon isip bawos sa gihatag niini nga tabang sa ilang mga molupyo atol niining pandemya bisan wala sila kasuporta sa niaging eleksiyon sa 2019 sanglit ang ilang grupo ug si Cho lain man nga partylist ang gisuportahan.

“Bawos lang ni sa tabang niya karon, amo gitabangan nga partylist wa man,” matud niya.