Kanhi polis gitipi didto sa bohol

CEBU, Philippines — Usa ka retiradong polis ang gibanhigan sa wala  pa mailhing mamumuno diha sa Purok 3 Valenzuela Barangay Poblacion, Panglao, Bohol alas-6 sa buntag kagahapong adlawa, Agosto 21,2020.

Sa imbestigasyon sa kapolisan ang biktima mao si Ramon Bolongaita, usa ka retirado nga pulis ug giingong drayber kaniadto sa gipatay nga self-confessed druglord nga si Jeffrey ‘Jaguar’ Diaz.

“Kanang polis (biktima) is retired na, parang involved kay Jaguar. Murag drug-related ang incident, baka merong transakyon baka nagka double-cross, mao na ang initial na investigation nato. But we will conduct further investigation on what happened to that particular retired police officer,” sigon pa ni Police Brigadier General Albert Ignatius Ferro, Police Regional Office (PRO) -7 Chief. Matud ni Ferro ilang balikan ang background ni Bolongaita aron matino ang uban pang posibleng motibo sa pagpatay kaniya.

Ilaha pa sab susihon kun si Bolongaita nalakip sa Presidential Watchlist sa mga polis nga nalambigit sa drugas.

Matud pang Police Lieutenant Amelito Melloria, hepe sa Panglao Police Station, wala pa nila masusi kung ang insidente may kalabutan sa pag-ambush ni Bolongaita kaniadtong 2015.

Kahinumdoman nga niadtong Agosto 2015 gisuwayan sa pagpatay si Bolongaita sa duha nga wala mailhing mga lalaki sa atubangan sa ilang balay sa Nivel Hills, Barangay Lahug ning dakbayan sa Sugbo.

“Sa pagkakaron amo pang gitan-aw if wala ba ni siyay na kontra, then nag conduct pa mi’g imbestigasyon sa panahon nga active pa ni siya sa polis, ug wala ba ni siya’y nakontra or unsa ba,” matud ni Mellora.

Nakaangkon si Bolongaita og tulo ka samad pinusilan sa iyang liog ug bukobuko samtang adunay tulo nga kabhang sa .9mm nga nakuha sa crime scene.

Nasulod sa serbisyo si Bolongaita niadtong Septiyembre 28, 1990 ug niretiro Enero 1, 2016 sa ranggo nga Senior Staff Sargent  ug kataposang assignment niini nahimong base police sa PRO-7. /IBM (BANATNEWS)