Apektado sa baha ug landslide pangitaan og kabalhinan

CEBU, Philippines — Mga residente sa Sitio Managuksok, Barangay Bonbon sa Cebu City nga nabanlas sa niawas nga sapa ug kadtong mga nagpuyo sa kilid niini pangitaan og mas luwas nga luna nga ilang kabalhinan.

“Ang Division for the Welfare of the Urban Poor (DWUP) nangita karon og lugar nga adto ibalhin kining maong mga residente”, sigon ni Konsehal Dave Tumulak.

Nanawagan si Tumulak sa mga residente sa mga landslide ug flood prone areas mohiklin sa mas luwas nga dapit.

Giawhag sab niya ang mga barangay nga balikan ang ilang Disaster Risk Assessment aron planuhon unsay posibleng buhaton nga matabangan kining mga maapektahan o posible pang maapektahan sa baha o pagdahili sa yuta sa ilang barangay.

Sa laing bahin, gimando ni Talisay City Mayor Gerald Anthony “Samsam” Gullas Jr. sa city engineering department niini nga trabahuon ang mga kanal nga maoy hinungdan sa pagbahad sa pipila ka barangay sa siyudad.

Si City Engineer Audie Bacasmas kinsa misusi sa mga dapit nga gibahaan miingon nga sagad sa ilang nakita, barado sa basura ang mga kanal ug dunay uban nga gipangtabunan gyud sa mga residente.

Ang Barangay Pooc, Poblacion ug Dumlog maoy nagrabehan sa paglunop sa baha sa nanglabay nga mga adlaw nga nagbunok ang uwan.

Samtang sa Lapu-Lapu City, nakita nga kining mga land development sa mga priadong land developers maoy nakapabara sa mga agianan sa tubig baha sa pipila ka barangay sa siyudad. Ang maong mga barangay naglakip sa Barangay Basak, Gun-ob, Babag, ug pipila ka mga sitio sa Barangay Calawisan.

Si Mayor Junard “Ahong” Chan miingon nga ilaha nang gipahibalo ang Department  of Environment and Natural  Resources (DENR) ug Department of Public Works and Highways (DPWH) bahin sa problema.

Sa pagkakaron, nigamit sila og water pumps aron ipasuyop ang napundong tubig tungod gi-abunong yuta ug gipangtukod nga mga kongkretong kural. Gabriel Bonjoc, Romeo T.  Limpangog/IBM (BANATNEWS)