Pagdahili sa yuta, baha nasinati tungod sa uwan

CEBU, Philippines — Pagbunok sa uwan sa Sugbo niresulta sa pagdahili sa mga yuta ug pagbaha sa nagkadaiyang lugar nga nakaapektar sa mga residente ug sa mga motorista.

Sa Sitio Lower Agsungot, Barangay Agsungot sa siyudad sa Sugbo nahugmak ang kilid sa bukid ug ang mga dagkong batok nababag sa karsada niadtong Miyerkules sa gabii gumikan sa pagbunok sa kusog nga uwan.

Ang naalihang karsada maoy agianan sa mga taga Barangay Guba, Adlaon, Lusaran, Mabini, Paril ug Cambinocot.

Matud ni Agsungot Barangay Captain Pedro Damaolao, niadtong Sabado pa sila nakabantay sa ginagmay nga pagdahili sa yuta sa maong lugar nga gituohan nilang epekto sa kusog nga linog sa Masbate.

Nanawag sila kang Konsehal Jerry Guardo aron masusi ang lugar ug wala una nila kini paagii, apan Miyerkules sa gabii nahitabo ang landslide.

Nangliki

Sa pagbisita sa Mines and Geosciences Bureau (MGB)-7 sa lugar gitan-aw nila kun unsay hinungdan sa pagdahili sa yuta.

Nakita ni Russyl Bryile Anthony Lanzadares, Senior Geologist sa MGB-7 nga habog ra kaayo ang kabkab, duna pa gyuy sapa sa ubos ug duna nay daang liki ang mga bato nga nasudlan na og tubig maong peligro gyung mahugno.

Si Guardo, kinsa maoy chairman sa Technical Infrastructure Committee  kauban sa MGB-7 nga misusi kagahapon sa lugar mirekomendar sa maong barangay sa pagpasar og resolusyon nga palapdan ang karsada aron kabkabon ang kilid niini.

Nabanlas

Lakip sa gisusi sa grupo ni Guardo ug MGB-7 ang Sitio Managuksok, Barangay Bonbon diin tulo ka balay ang gibanlas sa misuylang tubig gikan sa sapa niadtong Lunes sa hapon gumikan sa sagunson ang pagbunok sa uwan. Si Juliet Sabroso, kansang balay hingpit gyud nga gianod sa sapa misaysay sa Banat News nga igo ra siyang niadto sa balay sa ugangan aron paghuwam og cellphone charger, apan sa iyang pagbalik nibunok na ang uwan ug paspas nga misaka ang tubig sa sapa ug sa iyang karatol dali niyang gikuha iyang mga anak.

Tungod niini, gisultihan ni Guardo ang mga nagpuyo daplin sa sapa nga mag-amping ug giawhag niya ang barangay paghimo og resolusyon aron dili patukoran og balay ang kilid sa sapa aron luwas ang tanan.

Sa Dakbayan sa Talisay, nagdasok ang mga sakyanan sa karsada diha sa Barangay Linao tungod sa paglapaw sa baha ug dili maagian matag mobunok ang uwan.

Si Kapitan Ulysses Raganas  miingon nga dunay duha ka kanal ang maong dapit apan nabuni sa basura sa mga tawo.

Matud niya, disiplina ra gyud sa mga residente sa paghipos og tarong sa ilang basura ang nakaingon niini. Rowena Capistrano, Gabriel Bonjoc/IBM (BANATNEWS)