20 kaso ra ang natala sa Cebu City
CEBU, Philippines — Wala kaabot og 100 ang nadugang nga bag-ong kaso sa coronavirus disease sa tibook Central Visayas base sa Agosto 16, 2020 nga datus nga gipagawas sa Department of Health-7.
Sa 72 ka mga bag-ong kaso, 20 ang natala sa Cebu City, lima sa Mandaue, 18 sa Lapu-Lapu, 23 sa Probinsya sa Sugbo, usa sa Minglanilla, duha sa Consolacion, ug tulo sa Bohol.
Samtang 45 usab ang nadugang sa mga naka-recover na sa gikan sa maong sakit ug karon 12, 806 ang total recoveries sa rehiyon samtang 1, 040 usab ang namtay.
Sumala sa DOH-7, 17, 866 na ang cumulative total sa covid-19 sa tibook rehiyon.
Cebu City
Sa unang adlaw sa extension sa General Community Quarantine (GCQ), Agosto 16, way natalang nakalas sa COVID-19 sa Cebu City .
Nianang adlawa ang total confirmed cases sa siyudad anaa sa 9,383 diin 1,563 niini ang total active cases ug nagbilin nga 615 ang nakalas.
Niabot na sab sa 7,205 ang total recoveries sa siyudad sa COVID-19.
Nasayran nga padayon gihapon ang pag-atiman sa Cebu City Government sa mga residente niini pinaagi sa pagdala kanila sa mga quarantine centers.
Lapu-Lapu City
Sa laing bahin, ang Barangay Pusok sa Dakbayan sa Lapu-Lapu mao ang nag-una sa kaso sa coronavirus disease 2019 sa 30 ka mga barangay sa maong siyudad.
Samtang dili na COVID free ang 11 ka mga barangay sa Isla sa Olango sa maong dakbayan .
Matud pa sa Facebook post ni Mayor Junard ‘Ahong’ Chan ang barangay Pusok adunay 266 ka kaso samtang 207 usab ang recovery ug 13 ang namatay.
Sunod ang Barangay Basak nga nakatala usab og 246 ang nakatala usab og 168 nga recovery, 16 ang namatay
Gipahibalo sab ni Chan niadtong Domingo, Agosto 16, 2020 dili na maisip nga COVID 19 free ang Olango island tungod kay lima ka barangay niini ang nakatala og mga kaso gikan sa Santa Rosa, Tingasan, Sabang, Tingo ug Caw-oy, apan kadaghanan nangaayo na.
Talisay City
Samtang sa laing bahin, nataptan sa maong sakit ang usa ka konsehal ug sa Barangay Linao Dakbayan sa Talisay. Lakip ang asawa niini natakboyan sab matud pang Kapitan Ulysses Raganas.
Matud pa nga ang magtiayon nagpa-swab test ug nigawas nga positibo sila. Giingon nga pito ka adlaw ng na-admit sa pribadong tambalanan ang konsehal.
Ang tindahan sa magtiayon ang gisirad-an samtang gimonitor ang mga sakop niini nga wala ra hinuoy gipamati sa ilang kalawasan. Romeo Limpangog ug Gabriel Bonjoc/IBM (BANATNEWS)
- Latest
