Molupyo sa UP Lot sa Talisay nakakita og paglaum

CEBU, Philippines — Gikalipay sa mga molupyo sa UP lot sa Barangay Mohon, Dakbayan sa Talisay ang tubag sa ilang hangyo nga matuman ang land swapping.

Si Lorde Templado, presidenti sa United Hearts Neighborhood Of Sto. Niño Home Owners Association (UNIHEARTS-NOSNHOA) nagkanayon nga gipadad-an kini nila og suwat kaniadto ang nanag-iya sa luna nga gitarokan sa ilang kabalayan apan wala sila tubaga.

Hangtud nga si Templado ni email kanila ug sila gitubag pinaagi sa pagpangutana kung unsa ka ligdong ang ilang asosasyon.

Matud pa niya nga hagbay ra gyud sila nangandoy niini aron mahuwasan sab ang ilang kabalaka nga mapapahawa sa ilang gipuy-an.

Ang luna gibana-bana nga 5.3 ektarya ang gilapdon apan nakuhaan kini gumikan sa karsada nga nalakip sa Cebu South Coastal Road P.

Dugay na nga panahon nagpatabang ang mga molupyo sa siyudad pinaagi sa land swapping aron sila mahiluna.

Si Templado nitataw nga daghan na nga asosasyon sa urban poor ang naa sa lugar gani sa ilaha lang nga grupo naa na sa 384 ka mga panimay ang iyang miyembro.

Misamot ang iyang kalipay sa dihang mipasalig si Bise Mayor Alan Bucao nga motabang kanila aron lang nga mosugot ang tag-iya sa luna nga magbaylo og luna.

Asoy pa niya nga dako pa gyud kini og trabahuon apan siya positibo nga madayon ang ilang mga damgo pinaagi sab sa pagtabang sa siyudad.

Hinuon wala pa mahisguti kun asa nga luna ang i-swap ug kun unsay paagi.

“Amo una hulaton ang UP Cebu sir, while ako pud i-discuss ni sir Alan (Bucao) ang mga updates kay ang amo association nakahatag naman og resolution diha sa city para ana plano land swapping,” sigon pa ni Templado.

Nasagmuyo lang siya sa uban nga nagpuyo tungod kay gipamaligya ang ilang rights.

Wala lang siyay mahimo tungod kay wala pa silay katungod sa pagpugong sa pipila nga mobuhat sa ingon.

Taud-taod na nga nahimong kontrobersya ang maong luna tungod kay daghan ang nisupak sa dihang gamiton na unta sa tag-iya ang luna.

Gani daghan nasab ang nangagi nga politiko nga nipatunga niini apan walay nahitabo. /IBM (BANATNEWS)