12 ka tawo nasikop sa tigbakay diha sa Compostela

CEBU, Philippines — Gitanggong karon sulod sa detention cell  sa kapolisan sa Compostela ang 12  ka mga sugarol nga nadakpan sa akto  sa gipasiugdahan nilang tigbakay diha sa Purok Chicos sa Barangay  Magay, Lungsod sa Compostela niadtong Sabado.

Si Police Staff Sergeant Renato Inot  sa  Compostela Police Station  miingon nga naglakip  sa mga nadakpan mao ang mga sugarol og tigbakay sa silingang lugar nga mao ang Dakbayan sa Danao.

Matud pa ni Inot nga kapin  sa 20  ka mga tawo ang nagtapok atol sa tigbakay apan  nakaeskapo ug daling nakadagan hinungdan  nga ang 12 lang ang ilang nasikop. Lakip  sa nakuha nga mga ebidensiya mao ang manok hiniktan nga padulong  na unta nga itari.

Gikatakda silang pasakaan og kaso sa korte karong adlawa ug mahimo silang makagawas sa bilangguan sa higayon nga makahatag og pyansa nga giingong moabot ngadto sa 30 mil  pesos. /MEL (BANATNEWS)