Magpataka og labay sa ginamit nga face mask silotan
CEBU, Philippines — Gitinguha ni Mayor Joannes Alegado sa Lungsod sa Consolacion nga silotan ang mga residente sa lungsod nga masakpang magpataka og labay sa ilang mga disposable mask.
Matud ni Alegado nga nabantayan nila nga ubay-ubay ang naggamit og mga disposable mask sulod na sa duha ka semana.
Giingong adunay uban isagol sa ubang basura ang ilang ginamit na nga mask ug naghatag kini og risgo sa panglawas sa katawhan.
Giawhag ni Algeado ang konseho sa lungsod nga mopalabang og ordinansa pagsilot sa mga dili motarong og labay sa ilang ginamit nga mask.
Giingong ang mga masakpang magpataka og labay sa ilang ginamit nga mask mamahimong makabayad og multa gikan sa P500 ngadto sa P2 mil.
Si Alegado nagkanayon nga mas maayo nga ilahi ang labayanan o sudlanan sa mga ginamit nga face mask gikan sa mga regular nga basura.
Ug ang barangay kinahanglang mag-schedule og adlaw sa pagkolekta sa mga basur nga face mask. Subay niini, ang kagamhanan sa Dakbayan sa Mandaue nagtinguha usab nga himoan og pagtuon ang hustong paglabay sa ginamit nga mga face mask.
Si Konsehal Joel Seno niawhag kini sa buhatan sa Department of General Services (DGS) sa pagsugyot og mga pamaagi alang sa tukmang paglabay sa mga ginamit na nga face mask. Matud ni Seno nga ang pagpataka og labay sa mga ginamit nga face mask delikado kini sa pagkatap sa COVID-19.
Si Seno nagkanayon nga ang buhatan sa City Environment and Natural Resources (CENRO) ang mohimo usab og mga lakang alang sa tukmang pamaagi sa paglabay sa ginamit na nga face masks. —/BDB (BANAT NEWS)
- Latest