Lapu-lapu nag-andam na sa pagbukas sa turismo

Cebu, Philippines — Nangandam na ang Dakbayan sa Lapu-lapu sa subling pagbukas sa turismo sa ilang syudad ingon man andam na usab sila nga mapaubos ngadto sa modified general community quarantine MGCQ.

Nagtuo si Mayor Junard Ahong Chan nga epektibo ang mga lakang nga ilang gihimo pagsumpo sa pagkatap sa COVID-19 tungod kay nag-anam pagkunhod ang datus sa mga nag positibo sa virus.

Suma pa ni Chan nga lakip sa ilang gihingusgan mao ang pagtuman sa mga health protocols, pagpahigayon og contact tracing aron mapahiluna gilayon sa mga isolation facility ang mag positibo sa COVID-19..

Tinguha na usab sa mayor nga hinay-hinay na nga buksan ang industriya sa turismo bisan ngadto lang sa mga domestic clients.

Subay niini gihimo sa Tourism Cultural and Historical Affairs Commission (TCHAC) ang pagsusi sa kahimtang sa mga hotels ug resorts pagsiguro nga luwas ang mga turista.

Siyam ka mga hotels ang gibisita na sa mga sakop sa TCHAC aron masuta ang ilang kaandam sa subling pagbukas sa Turismo sa Dakbayan. (BANAT NEWS)