Mga JO sa Talisay makadawat og hazard pay

CEBU, Philippines — Ang mga job order nga kawani sa Dakbayan sa Talisay makadawat na kini sa ilang hazard pay.

Kini ang gipahibawo ni Kapitan Josefina Concial, presidente sa Association of Barangay Council (ABC) sa siyudad.

Sayo pa, ang mga JO lang nga nadestino diha sa Talisay City Hall ang nakadawat og hazard pay hinungdan nga nihangyo ang  mga JO nga nadestino diha sa mga barangay nga hatagan usab unta sila og hazard pay.

“Unsa may among kalahian sa uban job order nga nitrabaho man sad mi panahon nga gi-quarantine”, matud sa usa sa mga JO kinsa nagdumili sa pagpabutyag sa pangalan.

Si Concial maoy nipaabot ngadto   kang Mayor Gerald Anthony “Samsam” Gullas, Jr. sa hangyo sa nahisgutang mga JO.

Matud ni Concial nga human sa ilang tigom nakadawat siya og pagsanong ni Gullas kabahin sa nahisgutang hangyo sa mga JO.

Ang kagamhanan sa siyudad bisan og nag-budget sa pundo tungod sa nasinati nga pandemiya karong panahona, gigahinan gihapon nila ang hazard pay alang sa mga JO bisan og ginagmay lang kini. – Gabriel C. Bonjoc/BDB

Maribago adunay kaugalingong disinfection team

Ang Barangay Maribago, Dakbayan sa Lapu-Lapu nagbaton kini og kaugalingong disinfection team kinsa maoy mopahigayon og disinfection diha sa ilang lugar aron malikayan ang pagkatap sa COVID-19.

Si Kapitan Resalino Abing nitahas kang Konsehal Arvin Abing nga mangulo sa nahisgutang team sa pagpahigayon og disinfection ug decontamination diha sa ilang barangay.  

Ang silingan nga mga barangay sa Maribago mahimo usab nga mohangyo kanila alang sa pagpahigayon og disinfection.                           

Ang disinfection team gitahasan usab sa pagpahigayon og rekorida nga nagpahimangno kabahin sa pagtuman sa mga health protocols sa paglikay sa COVID-19.

Nunot niini, si Mayor Junard Ahong Chan nigamit sa mga tricycle driver sa pagpahigayon og rekorida diha sa mga hilit nga dapit sa siyudad kabahin sa gipatuman nga health protocols aron malikayan ang pagkatap sa virus.     

Kagahapon, ang 97 ka motorsiklo nagpadayon sa gihimo nilang rekorida.

Kini maoy ikaduhang hugna sa gihimo nilang kalihokan diin ang mga tricycle driver nagbutang kini og tarpaulin diha sa ilang sidecar sa kampaniya batok sa COVID-19.

Ang mga residente sa lugar gipahimangnoan kini nga kanunayng magsul-ob og facemask kong mogawas sa ilang panimalay, mosunod sa social distancing ug manghunaw kanunay gamit ang tubig ug sabon o alcohol. /BDB (BANATNEWS)