Rep. Dizon midonar og bondpaper sa mga tunghaan sa Mandaue ug Consolacion

CEBU, Philippines — Gihangop sa mga magtutudlo ug kadagkoan sa Department of Education (DepEd) sa Mandaue City School Division ang gihimo ni 6th District Representative  Emmarie Lolypop Ouano Dizon nga pagdonar ngadto kanila og mga ream sa bondpaper alang sa mga tinun-an sa publikong tunghaan sa siyudad.

Sa nasayran ang pagbukas sa klase gikatakda karong Agosto 24 diin lakip sa pamaagi nga gisugyot mao ang online classes o ba kaha pinaagi sa modular alang niadtong walay internet.

“Nagkuwang gyud ron ang supplies para sa mga teachers kay bag-o man ning pamaagi ang pagtudlo karon, daghan kaayo silang gipanghimo nga mga modules,” suma ni Dizon.

Ang Kongresista miduaw sa Consolacion niadtong  Agosto  7 aron pagtunol sa mokabat sa 300 ka reams sa bondpapers sa Consolacion National High School.

Unang nakadawat og 500 ka ream sa bondpaper ang mga tunghaan sa Dakbayan sa Mandaue.

Gitataw sa kongresista nga migamit sila sa  ilang personal nga salapi pinaagi sa Ouano Care  alang sa paghimo sa maong katuyoan.

“Dili man ang mga teachers ra ang maka benefit ani, hasta pud ang mga parents and students aron dili na sila mag-contribute or mogasto for the learning materials. Ang pagtuon nalang gyud sa mga bata ang tutukan,” dugang pa niya.

Sa nasayran si Dizon duna kini programa nga naghatag og importansya sa edukasyon nga gitawag og “Edukasyon Mo, Pangandoy Ko.” ug bisan karon nga anaa pa siya sa unang termino sa kongreso aduna pa gihapon siyay  scholarship program sa ikaunom nga distrito. /MEL (BANATNEWS)