Dizon nangayo og breakdown sa P2.9 bilyon

CEBU, Philippines — Giawhag ni Konsehal Alvin Dizon sa Dakbayan sa Sugbo ang buhatan ni Mayor Edgardo Labella nga mohatag og detalyado ug itemize nga breakdown sa gigastohan sa P2.9 bilyones nga pundo nga gigamit sa pakigbatok sa COVID-19.

Matud ni Dizon nga iyahang gihangyo ang mayor sa pag-post sa detailed expenditure report diha sa city government website, mayor’s facebook page, barangay halls ug sa lokal nga pamantalaan aron maklaro ang fiscal transparency and public accountability.

Si Dizon nagkanayon nga dul-an sa P3 bilyones ang giaprobahan sa city council nga magamit sa siyduad alang sa hinabang ug pakigbatok sa COVID-19. Lakip na niini ang pagpamalit og relief goods, PPE, COVID-19 testing kits ug uban pa.

Giawhag usab ni Dizon ang secretary sa Sangguniang Panlungsod (SP) sa paghatag og kopya ngadto sa buhatan ni Labella sa iyang resolusyon alang sa ilang information ug guidance. /BDB (BANATNEWS)