MGCQ tinguha sa TF COVID-19 Cebu

CEBU, Philippines — Nagkanayon si Environment Secretary Roy Cimatu kinsa maoy Overseer Task Force COVID Cebu nga dili sila mohunong sa gihimo nila nga lakang aron mapaubos pa ang kaso sa coronavirus disease (COVID)-2019 sa Dakbayan sa Sugbo.

Si Cimatu gipadala ni Presidente Rodrigo Duterte sa dakbayan aron motabang sa lokal nga kagamhanan sa pagpaubos sa kaso human natala ang labing daghan nga kaso sa COVID-19 sa dakbayan.

Matud ni Cimatu tinguha nila nga makab-ot ang modified general community quarantine sa Siyudad sa Sugbo nga kasamtangang gipaubos sa general community quarantine sugod niadtong Agosto 1.

“This is really the goal of each Cebuano to recover the economy in Cebu and for the people to already go into some recreations for themselves hindi nalang restricted sa bahay, with the blessings of the Lord the people of Cebu will finally achieve this,” matud ni Cimatu.

Gibutyag sab niini ang mga lakang nga gihimo sa lokal nga kagamhanan nga nakatabang aron maminusan ang pagtakod-takod sa virus ug nitaas ang recovery rate sa COVID-19 sa dakbayan.

“The first order was to make some appeal to the people of Cebu to follow instructions, guidelines and to me that was initial stage of success in united effort for the solution of the problem. Then the next group probably is accumulation of testing, the contact tracing and the lockdown so ito yung tatlo na yan ang nagsama-sama in no order lahat-lahat yan nagsama-sama ang tatlo na yan to complete the effort that was made with the City of Cebu,” dugang ni Cimatu.

Disiplina

Subay niini, si Cebu City Mayor Edgardo Labella subling nihangyo sa katawhan nga mosunod gihapon sa mga basic health protocols.

Matud ni Labella nga kung walay disiplina usag-usa, ang katawhan ra usab ang mag-antus ilabi na kung mabalik sa enhanced community quarantine status.

Ang Department of Health subli sab nga nipahimangno sa katawhan sa pagpabilin lang gyud sa panimalay kung walay mga importante nga lakaw.

Matud sa tigpamaba sa DOH-7, Dr. Mary Jane Loreche, nga hunahunaon sa mga Sugbuanon nga ang GCQ status wala kini naghatag og katungod nga maglaag-laag bisan asa sama sa normal nga sitwasyon.

Pahimangno ni Loreche nga dili kalimtan ang pagsunod sa mga minimum health standard sama sa pagsul-ob og facemask, physical distancing, paghugas sa kamot aron luwas ang panimalay ug ang komunidad.

Dugang ni Loreche nga kung magpakabana ang katawhan dili masayang ang adlaw nga gihatag sa siyudad ubos sa GCQ. Rowena D. Capistrano/GMR (BANATNEWS)