Frontliners sagad natakdan sa virus sa Talisay

CEBU, Philippines — Kasagaran sa mga bag-ong kaso sa COVID-19 sa Dakbayan sa Talisay mao ang mga frontliners sa tambalanan.

Kini maoy gibutyag ni Dr. Lino Alanzado, pangulo sa City Health Office.

Matud niya nga na-expose ang mga frontliners sa tambalanan sa mga pasyente sa COVID-19 hinungdan nga kini natakdan.

Lakip sa nakatampo sa bag-ong kaso mao kadtong mga trabahante nga nagpa-swab test kay gikinahanglan sa ilang kompaniya sa dili pa kini makatrabaho pagbalik.

Hinuon dili kini angay nga ikabalaka kay naa na sa 71 porsyento sa recovery rate ang siyudad.

Nagkanayon si Alanzado nga 754 ang kinatibuk-ang kaso sa siyudad apan ang nakarekober niabot na sa 551 samtang 126 lang ang aktibo niini ug 75 ang namatay.

Niubos sab ang ihap sa mga bag-ong kaso sa mga tawo nga natakbuyan sa virus.

Liboan nakarekober

Samtang gilauman nga mosaka pa ang gidaghanon sa mga nakarekober nga pasyente sa COVID-19 sa Dakbayan sa Mandaue.

Hangtud Agosto 3, maoy natala ang 1,056 ka pasyente nga hingpit na nga naayo sa sakit.

Nakatala pa gihapon ang siyudad og pagsaka sa mga nagpositibo human dunay 10 nga nadugang kutob sa maong petsa.

Ang Department of Health 7 nakatala na og 9,994 nga nakarekober sa COVID-19 sa Central Visayas kutob Agosto 3, 2020.

Kini human 334 ang nadugang sa mga recoveries sa maogn adlaw samtang 72 ka bag-ong kaso ang natala hinungdan nga 5,799 ang active cases sa tibuok Central Visayas gikan sa 16,654 nga cumulative cases.

Sa mga bag-ong kaso, 27 ang natala sa Cebu City, 11 sa Mandaue City, lima sa Lapu-Lapu City, 22 sa Cebu Province, tulo sa Talisay City, duha sa Minglanilla, ug duha sa Consolacion.  Sa mga active cases 1,718 ang naa sa tambalanan samtang 4,081 ang naa sa isolation centers. Ang mortality usab niabot na og 861 lukop Central Visayas sumala sa DOH-7. Romeo T. Limpangog Le Phyllis F. Antojado/GMR (BANATNEWS)