Consolacion ug Lapu-Lapu: Mag-contact tracing ug swab testing
CEBU, Philippines — Mopasiugda og targeted testing ang lokal nga kagamhanan sa Lungsod sa Consolacion aron mahibaw-an ang gidaghanon sa community infection sa COVID-19 sa ilang lugar. Ang Consolacion apil kini sa mga lugar nga gipaubos sa general community quarantine diin lakip usab kini sa mga lugar nga adunay daghang natala nga kaso sa COVID-19.
Si Bise Mayor Teresa Alegado nagkanayon nga mohimo ang lokal nga kagamhanan og prevalence testing diin mao usab kini ang hangyo sa opisyales sa Department of Health (DOH)-7.
“Kana siya nga epidemiologic statistics, makita nato kon unsa ka lapad ang infection sa area”, matud ni Alegado. Matud ni Alegado nga ang mga medical frontliner sa lungsod ang gitahasan nga mopatapok sa mga tawo ug ang mga personnel sa DOH-7 maoy gihatasan sa contact tracing.
Sa laing bahin, si Mayor Junard Ahong Chan sa Dakbayan sa Lapu-Lapu mopahingusog sa contact tracing activities sa siyudad kalabot sa COVID-19.
Ang kapolisan ug kabomberohan ipakatap kini diha sa matag barangay sa siyudad.
Si Chan nipahigayon og coordination meeting uban sa mga medical frontliner, police personnel, Bureau of Fire Protection ug Barangay Health Emergency Response Team alang sa pag-andam sa implementasyon sa proactive nga pamaagi sa contact tracing.
Matud ni Chan nga ang siyudad mas makakontrolar sa pagsaka sa COVID-19 kong mapalambo pa ang contact tracing ug testing.
Dugang ni Chan nga kon dali ang contact tracing, mapadali usab ang pag-swab ug pag-isolate sa natakboyan sa COVID-19. —Rowena D. Capistrano/BDB (BANATNEWS)
- Latest
