Grabeng trapik nisugat sa GCQ
CEBU, Philippines — Sa ikatulong adlaw sa pagpaubos sa Dakbayan sa Sugbo sa general community quarantine nasinati ang grabeng huot sa trapiko sa kadalanan sa dakbayan kagahapon.
Kadaghanan sa nanagan mga pribadong sakyanan ug gidugangan sa pipila ka bus de pasaheroan ug mga taxi.
Kagahapon mao sab ang unang adlaw sa pagbukas sa mga gitugutan nga mga establisemento diin duna nay namalik sa trabaho.
“Murag hapit naman ta basin lang maluoy ang Ginoo mo back to normal ta so ang mga tawo murag sabik na gyud sila modagan sa kadalanan, mobalik na og normal mao na daghan kay mga sakyanan nga gadagan na sab karon,” matud sa pangulo sa Cebu City Transportation Office nga si Alma Casimiro.
Si Casimiro nipahibawo nga padayon ang road closure sa pipila ka mga dalan hangtud wala pay direktiba sa paglibkas niini.
Pahimangno ni Casimiro sa mga motorista nga dili kalimtan ang mga dokumento sa pagbiyahe lakip ang pagtuman sa mga protocols ubos sa GCQ.
Checkpoints gihugtan
Gipahugtan sa Cebu City Police Office ang mga checkpoints sa dakbayan kagahapon hinungdan sab sa huot sa dagan sa mga sakyanan.
Gipasabot ni CCPO Director Josefino Ligan nga unang adlaw sa pagtrabaho sa uban hinungdan nga sa checkpoint pa lang sa pagsulod sa dakbayan istriko na nga susihon sa kapolisan ang mga dokumento sama sa travel passes.
Sumala pa ni Ligan nga sutaon gyud nila kung ang tawo tinud-anay ba gyud nga trabahante.
Gawas niini susihon sab sa kapolisan ang mga quarantine passes sa mga mogawas aron lang sa pagpalit og pagkaon, tambal ug uban pa. Dugang ni Ligan nga bisan ubos na sa GCQ ang Dakbayan sa Sugbo kinahanglan mosunod gihapon sa schedule sa paggawas base sa QP code.
Awhag niya sa publiko nga kung walay importante nga lakaw magpabilin lang sa ilang mga balay.
Disiplina batunan
Sa pagsuroy nilang Cebu City Mayor Edgardo Labella uban sa Ligan niadtong Sabado ug Domingo, daghang nadakpan nga mga nilapas sa lagda sa GCQ samtang minus ang mga nangadto sa mga malls.
Usa sa lagda mao nga dili makasulod sa mall kung walay quarantine pass, tan-awon ang body temperature, dili pasudlon ang walay facemask ug kinahanglan i-obserbar ang social distancing.
“This is a challenge to all of us, imbis na mura tag mogara ato hinoon batunan ang pag-adopt nianang self-discipline, more circumspect, more careful, more alert kaysa magpakita ta nga complacent ta tungod kay nag-GCQ ta and we will take this a challenge people of the City of Cebu,” matud ni Labella.
Trapik sa talisay
Samtang human sa pipila ka buwan nga mingaw ang kadalanan, nasinati pagbalik sa Dakbayan sa Talisay ang grabeng trapik kagahapong adlawa.
Si Jonathan Tumulak, traffic czar sa siyudad, nagkanayon nga daw sama kaniadto nga wala pay pandemya ang nanggawas nga sakyanan. Daghang sakyanan ang padulong ug pagawas sa dakbayan ilabi na nga pareho na nga gipaubos sa GCQ ang kanit nga Dakbayan sa Sugbo.
Matud ni Tumulak nga nagsugod ang paghuot sa trapiko mga alas 6 sa buntag hangtud sa alas 11 sa buntag samtang nasinati pa gihapon sa Banat News ang trapik sa gagmay nga karsada sa dakbayan lapas sa alas 12 na sa udto.
Ang Natalio Bacalso Avenue sa Barangay Bulacao padayon nga gisirhan samtang nagpatuman ang Siyudad sa Sugbo og one exit, one entrance. Sheriza Mae R. Uy, Gabriel C. Bonjoc/GMR (BANATNEWS)
- Latest