Kaso sa COVID-19 sa Cebu City nagkaubos

CEBU, Philippines — Nagkaubos ang nadugang nga kaso sa coronavirus disease (COVID)-2019 sa Siyudad sa Sugbo samtang gipaubos sa general community quarantine.

Niadtong Domingo nga maoy ikaduhang adlaw sa GCQ, ang Department of Health nakatala lang og 22 ka bag-ong kaso sa COVID-19 ug walay namatay.

Ang Siyudad sa Sugbo dunay 9,075 ka total confirmed cases diin 5,609 niini ang total recoveries ug naa sa 2,946 ang total active cases.

17 SA ARGAO

Samtang ang Lungsod sa Argao nakatala og 17 ka bag-ong kaso sa COVID-19 niadtong Sabado kinsa kadaghanan giingong na-expose sa usa ka social gathering nga gitambungan sa mga close contacts nga unang nagpositibo sa virus.

Base sa social media page sa lungsod, ang mga nagpositibo naggikan sa Barangay Canbanua, Lamacan, Poblacion ug Tulic.

Usa ka tuig nga batang lalaki ang labing bata nga nagpositibo ug 71-anyos usab ang labing tiguwang.

Nagpadayon ang contact tracing team sa pagsuta sa mga posibleng close contacts sa mga bag-ong kaso nga ipaubos sa swab test karong adlawa.

Pito ka pasyente nga symptomatic ang anaa sa IC3 Temporary Treatment and Monitoring sa Dakbayan sa Sugbo.

Daghan nakarekober

Sa pikas bahin nagkadaghan ang nangaayo sa COVID-19 sa Central Visayas sumala sa DOH-7. Niadtong Agosto 2, niabot na sa 9,657 ang nakarekober sa tibuok rehiyon human nadugangan og 83.

Ang bag-ong kaso nga natala niadtong adlawa niabot sa 92 apil na ang 22 sa Dakbayan sa Sugbo; pito sa Mandaue City, 22 sa Lapu-Lapu City, 27 sa Cebu Province, lima sa Negros Oriental ug usa sa Bohol.

Ang active cases sa Central Visayas anaa na sa 6,075 gikan sa 16,586 nga cumulative cases sa COVID-19.

Si Dr. Mary Jean Loreche, tigpamaba sa DOH-7, nitataw nga sa duha ka kaso nga gikataho sa Probinsiya sa Siquijor, usa ra ang natala sa ilang buhatan.

Giingong ang swab sa usa didto sa Vicente Sotto Memorial Medical Center sub-national laboratory nabasa nga maoy natala sa ilang buhatan samtang ang usa didto nagpa-swab sa usa ka accredited laboratory facility sa kaulohan ug naabot na kini sa Siquijor una pa nigawas ang resulta nga positibo. Rowena D. Capistrano, Le Phyllis F. Antojado/GMR (BANATNEWS)