Pagdahili sa yuta nasinati sa Talisay ug Cebu City

CEBU, Philippines — Gipahimangnoan sa pangulo sa City Disaster Risk Reduction and Management Office (CDRRMO) sa Siyudad sa Talisay ang katawhan nga mag-alerto karong panahona gumikan sa sunod-sunod nga pag-uwan.

Si Alvin Santillana, pangulo sa CDRRMO nagkanayon nga nisaka ang tubig sa sapa ug nihumok usab ang yuta sa kabukiran.

Matud ni Santillana nga gipaalerto niya ang iyang mga sakop ug gipasidan-an nila ang mga nagpuyo daplin sa sapa nga mag-alerto sa posibleng kalit nga pagsaka sa tubig.

Ang mga residente sa bukirang bahin sa siyudad ilaha usab kining gipasidan-an nga magmabinantayon aron malikay sa disgrasya kong ugaling adunay mahitabong pagdahili sa yuta. Gikataho nga pipila ka lugar sa Manipis, Campo 4 ug ubang bukirang barangay sa siyudad ang nakasinati na og pagdahili sa yuta.

Gibutyag ni Santillana nga 100 ka tawo ang ilang napabakwit diha nisaka ang tubig sa sapa tungod sa sunod-sunod nga pag-uwan ug namalik usab dayon kini sa ilang mga pinuy-anan dihang niubos na ang tubig.

Sa laing bahin, si Konsehal Dave Tumulak sa Dakbayan sa Sugbo niawhag sa mga opisyal sa bukirang barangay sa siyudad sa pag-ila ug pag-monitor sa landslide prone sa ilang lugar.

Ang panawagan ni Tumulak gihimo human sa nahitabong pagdahili sa yuta diha sa Barangay Kalunasan diin duha ka balay ang naguba sa maong insidente.

Dugang ni Tumulak nga ang mga pamilya nga nagpuyo sa high risk areas kinahanglang pabalhinon sa dinalian nga panahon sa paglikay sa disgrasya.

Ang Metro Cebu nakasinati kini og ulan-ulan sa nilabayng duha ka adlaw gumikan sa low pressure area nga nisulod sa Philippine Area of Responsibility (PAR). —Rowena D. Capistano/BDB (BANATNEWS)