267 LSIs nga taga Bohol gihatud sa PCG
CEBU, Philippines — Mga taga Bohol nga locally stranded individuals nga nangatanggong sa Manila tungod sa quarantine nakauli na sa ilahang probinsya human gihatud sa mga barko sa Philippine Coast Guard pinaagi sa “Hatid Tulong Program” sa nasudnong kagamhanan kagahapong adlwa.
Ang 267 ka Locally Stranded Individuals (LSIs) nga taga Bohol gidala sa BRP Gabriela Silang (OPV 8301), BRP Malapascua (MRRV 4403) ug BRP Cabra ( MRRV 4409).
Una pa sila gipasakay sa barko, gipaubos silang daan sa rapid test ug health protocols ug nagbitbit sab sila sa ilang mga travel documents ug health certificates.
Unang naabot sa Tagbilaran City sa Bohol ang MRRV-4403 nga dunay dalang 24 ka LSIs ug pagkaalas-3 sa hapon naabot sab ang OPV 8301 nga dunay dalang 218 LSIs ug ang MRRV-4409 nagdala sab og 25 ka LSIs. Mao na kini ang ikatulong hugna sa “Hatid Tulong Program” sa PCG paingon sa Tagbilaran City nga dunay total 344 LSIs gikan sa first wave.
Ang maong operasyon alang sa Central Visayas ubos sa pamunoan ni Radm Jose William U Isaga ang Commander sa Coast Guard District Central Visayas. /IBM (BANATNEWS)
- Latest
