PBB sa mga trabahante giuyonan ni Cimatu

CEBU, Philippines — Subling ilusad ang Project Balik Buhay (PBB) human nisuporta ang Inter-Agency Task Force for Covid-19 Visayas sa maong tinguha, apan ning panahona ang tutokan mao ang pribadong sektor.

Ang tumong niini mao nga makahinayhinay na og abli ang komunidad ilabi na ang mga negosyo.

Ang PBB usa ka calibrated, scientific, and evidence-based transition ug basehan kun paluagan gikan sa Modified Enhanced Community Quarantine (MECQ) status ngadto na General Community Quarantine (GCQ) ang siyudad.

Si IATF Cebu Overseer Secretary Roy Cimatu nakigtigom na sa mga magpapatigayon ug mga mayor sa Sugbo ug gihisgutan ang relaunching sa PBB.

Naobserbahan sab niya nga mas misanong na karon ang mga Sugboanon sa mga health protocols ug makita kini sa pagkubos sa mga natakboyan ug maayo kining tilimad-on.

Matud niya, ang positivity rate sa Cebu City nikubos gikan sa 30 percent kada 100 ka Sugboanon niadtong Hunyo, karon 11 percent  nalang ning bulan sa Hulyo.

Samtang si Retired Maj. Gen. Melquiades Feliciano, deputy Chief Implementor for IATF in Cebu, misuporta sab sa PBB sa private sectors.

"There is no question that PBB is a good process and will work for all business establishments. The business sector has mentioned going through the process of having this plan being cascaded and disseminated to all the business establishments," matud pa niya.

Si Edmun Liu, chairman sa PBB sa private sector misaad nga mapagawas nila karong semanahona ang plano.

Maglakip unya niini ang  paghimo og workplace health standards ug regular testing protocols sa mga balay patigayon.

"PBB wanted to find a way to balance the lives and livelihood of the people, while not making it difficult for businesses to reopen,” sumala pang Liu.

Si Cimatu mitug-an nga kining gihimo sa Cebu maoy labing una sa nasud ug kining estratehiya himoan og manual aron tamdan sa ubang mga LGUs sa nasud.

Ang maong tigom gihan-ay ni Secretary Michael Lloyd Dino, Presidential Assistant for the Visayas nga gitambongan nilang Cebu Governor Gwendolyn Garcia, Cebu City Mayor Edgardo Labella, Mandaue City Mayor Jonas Cortes, Lapu-Lapu City Mayor Junard "Ahong" Chan, Talisay City Mayor Samsam Gullas, ug Minglanilla Mayor Elanito Peña. (BANATNEWS)