Babaye nalatayan ang ulo sa wing van patay
CEBU, Philippines — Patay ang usa ka babaye human kini naguroy ug nalatayan ang ulo sa wing van diha sa Cebu South Coastal Road habig sa Barangay Cansojong, Dakbayan sa Talisay niadtong Lunes sa gabii.
Ang biktima mao si Ivy Estañero, 37-anyos, minyo, taga Sitio Laray, Barangay San Roque sa nahisgutang Siyudad.
Samtang ang drayber sa wing van mao si Delfin Iba, 43-anyos, minyo, taga Barangay Maguikay, Siyudad sa Mandaue.
Base sa imbistigasyon sa Talisay City Traffic Division nasuta nga pareho nga padulong sa Siyudad sa Sugbo ang biktima kinsa nagmaneho sa iyang motorsiklo ug ang wing van nga gimaneho ni Iba.
Giingong nisuway sa pag-overtake si Estañero sa wing van apan nasaghid ang manobela sa motorsiklo niini ngadto sa wing van.
Si Estañero naguroy kini hinungdan nga natumba ang motorsiklong iyang gisakyanan ug nalatayan ang ulo sa biktima sa ligid sa wing van.
Human sa insidente si Iba boluntaryo kining nitahan sa iyang kaugalingon sa kapolisan. /BDB (BANATNEWS)
- Latest
