Nakapalit sa misteryusong manok nadismaya kang Labella

CEBU, Philippines — Gikwestiyon sa usa ka residente sa Barangay Sambag 1, Dakbayan sa Sugbo ang sinseridad ni Mayor Edgardo Labella nga masayud kung kinsa ang mga tawo nga nagpaluyo sa giingong mga kahiwian sa mga transaksyon ubos sa iyang administrasyon.

Si Marco Licinio “Bebot” Flores Gingoyon, taga Sitio Ascension sa maong barangay, nipadayag sa iyang kadismaya sa pamahayag ni Labella nga nipasa sa ilang reklamo ngadto sa buhatan sa Ombudsman labot sa gidonar nga mga manok nga giingong gipamaligya ngadto sa mga residente.

Matud ni Labella nga itugyan niya sa Ombudsman ang reklamo gawas nga wala siyay hurisdiksyon sa pag-imbestigar kang Konsehal Eduardo Rama Jr.

“Dismayado mi tungod kay naglikay sila nga mo-confront ini nga isyu. Di diay siya (Labella) intresado mahibawo sa tinuod?” matud ni Gingoyon.

Matud ni Gingoyon nga usa ka kawani sa City Hall nga maoy nagpahibalo kanilang mga residente labot sa gipamaligya nga manok ang mopamatuod sa maong pasangil sa higayon nga dunay imbestigasyon nga himoon.

“Gusto namo investigation, wa ko niingon si Rama ang namaligya,” sumala pa ni Gingoyon.

Dismayado sab si Gingoyon kang City Legal Officer Rey Gealon nga gidepensahan dayon ang mga barangay kapitan ug gihimong pamolitika ang isyu. “Si Gealon iya palutaw nga pamolitika para diversionary tactic, si Labella sad gigamit nga excuse ang Ombudsman basin naay iya alyado nga involved. He should take this matter seriously. We are part of the family isip siyay amahan sa siyudad,” matud ni Gingoyon.

Alang kang Gingoyon, layo pa kaayo sa tinuod nga sulbad na ang kaso sa maong mga manok tungod kay dunay mga tawo nga nibaligya niini ngadto sa mga pobreng molupyo sa siyudad.

“Manghinaut ko ni Labella nga aksyonan gyud ni niya,” dugang ni Gingoyon. /MEL (BANATNEWS)