2 sitio sa Alegria gipaubos sa granular lockdowns

CEBU, Philippines — Dili lang ang Cebu City ang dunay gipatumang granular lockdown, ang lungsod sa Alegria nipatuman sab niini human duna silay natalang duha ka bag-ong kaso sa COVID-19.

Sa official statement ni Alegria Mayor Verna Magallon nga gipagawas sa Alegria Public Information Office, ang granular lockdown ilang gipatuman diha sa Sitio Tapon sa Brgy. Sta. Filomena ug Upper Angasil sa Brgy. Madridejos.

Ang 79-anyos lalaki nga nagpakonsulta niadtong Lunes (Hulyo 20) kay naglisod og ginhawa ug gi swab test pagkasunod adlaw Hulyo 21. Matud pa nigawas ang resulta niadtong nakalabay nga gabii ug kini positibo sa COVID-19.

Samtang ang ikaduhang nagpositibo, usa ka 55-anyos nga babaye nga diabetic ug adunay chronic kidney disease ug na-admit sa silingan nga district hospital tungod gihapon kay naglisod sa pagginhawa.

Gi-swab test kini niadtong Hulyo 22 ug nigawas sa tambalanan niadtong Hulyo 24. Dihang nigawas ang resulta nga positibo kini sa virus gipaubos dayon kini sa isolation.

Ang ilang mga uwahing nakauban ug mga kabanay gikatakdang ipaubos sa swab test.

Tungod sa peligro nga mokuyanap ang sakit diha sa maong mga sitio, ang Municipal IATF nakadesider sa pagpaubos sa granular lockdowns sa duha ka sitio diin magpuyo ang duha.

Molanat sa usa ka semana ang lockdowns apan mag-agad gihapon kini sa resulta sa swab test sa mga kabanay kung kinahanglan pang lugwayan og laing usa ka semana

Ang munisipyo  maoy moabaga sa bugas ug canned goods sa mga apektadong pamilya samtang ang duha ka barangay maoy moabaga sa mga utanon ug uban pa. Gipaabot nga moluwat og executive order ang mayor bahin niini , samtang giawhag niya ang mga molupyo nga magpabilin sa balay  kun di importante ang lakaw ug kanunay nga magsuot og facemask ug mosunod sa tanan mga health protocols.

Agi og panagana, ang tanang mamauli nga OFWs ug mga locally stranded individuals, mga bag-ohay pang nakagawas sa tambalanan sa Cebu City o ubang dapit, kinahanglan nang mopaubos og 14 ka adlaw nga quarantine.

Samtang kadtong mga mobiyahe padung sa Cebu City ug sa ubang mga lungsod nga adunay kapin lima ka kaso sa COVID-19 kinahanglang mopaubos sab og 14 ka adlaw nga quarantine sa ilang pagbalik sa Alegria. /IBM (BANATNEWS)