Kapolisan sa Talisay nakadawat og pasidungog sa CPPO

CEBU, Philippines — Giila nga best performing investigation team ang Talisay City Police Station hinungdan nga sila gipasidunggan sa Cebu Provincial Police Office (CPPO).

Sila maoy numero uno sa kapulisan sa Probinsya sa Sugbo nga  gipangulohan ni Police Major Gerard Ace Pelare.

Gikan sa buwan sa Enero hangtud sa Hunyo ilang nasulbad ang 82 sud sa 88 ka mga kaso.

Ilang nakuha nga porsiyento ang 93.18 sa ilang pagsulbad sa mga krimen nga nahitabo sa ilang area of responsibility bisan paman sa pandemya nga giatubang sa tanan.

Matud pa ni Pelare nga daghan ang ilang nasulbad nga kaso gumikan sa Oplan Sempi nga ilang gihimo.

Siya nagkanayon nga ang tabang sa katawhan pinaagi sa paghatag og mga impormasyon mao sab ang dako og natabang kanila sa pagsulbad sa mga kaso.

Naglangkub ang investigation team sa pagpangulo ni Pelare ug sa iyang mga kauban nga sila si PCMS Emerito Sansan, Pat Ricky Abarquez, Pat Maximo Petalcorin, Pat Meldrid Labitad, Pat Clifford Lerio, Pat Dino Salazar, Pat Kim John Amolo, Pat Eleazar Belciña, Pat Ariel Balde, NUP Marian Ponce, NUP Analiza Ventic, NUP Calixto Manabat, Maricel Labitad, Claire Valerie Cabardo, Lenny Reponte.

Labing una kini sa kasaysayan sa Talisay City Police Station nga nakakuha sa maong pasidungog gikan sa Cebu Provincial Police Office CPPO.

Dugang pa ni Pelare nga isipon kini nila nga hagit sa ilang kaugalingon nga mas palig-onon pa ang ilang pagserbisyo sa natad sa kahapsay ug kalinaw. /MEL (BANATNEWS)