Bayad daan para makasuroy sa probinsiya

CEBU, Philippines — Sa pagbukas sa tourism activities sa Probinsiya sa Sugbo, ang mga bisita dili na kinahanglan nga mogamit og kwarta sa pagbayad sa entrance fee sanglit apil na kini sa tour package nga ilang bayran atol sa ilang pag-book online.

Wala nay walk-in sa pag-adto sa mga tourism sites sa probinsiya sumala ni Gob. Gwendolyn Garcia ug ang tanan moagi sa online booking portal nga himoon sa Kapitolyo uban sa Department of Tourism, Department of Trade and Industry, Department of Health ug Philippine National Police.

Sa online portal kinahanglan ihatag sa turista ang iyang basic personal information ug travel history alang sa contact tracing.

Ang pagbayad sa tour package iagi sa mga money transfer establishments sama sa MLhuillier samtang wala pay credit card payments.

“Tour packages must be fully paid, kinahanglan bayran tanan before commencement of the tour,” matud ni Garcia.

Pag-abot sa bisita sa destinasyon, mosunod kini sa health protocols sama sa social distancing, thermal scanning ug uban pa ug ipaubos sab sa tour brief ug hatagan sa ilang radio frequency identification confirmation code or RFID bracelet.

“Mahimo sad nga ang maong RFID bracelet nimo would also serve as an e-wallet nga mahimo ni nimo ang maing RFID, loadan nimo sa usa ka money transfer like MLhuillier mag-load ba ka diha og five thousand it become your e-wallet nga kung duna kay ubang gusto paliton kadto na imong gamiton, cashless tanan, contactless na,” matud ni Garcia.

Ang RFID bracelet kinahanglan sul-obon sa tibuok tour ug kausa ra kini magamit. Ang mga turista kinahanglan kini magsul-ob sa ilang air purifier kung wala sila nianang device mamahimo sila maka-renta og mga air purifier nga disinfected na didto sa site.

Ang mga tourist operator, ug mo-entertain nga personnel kinahanglan sila mosunod sa health protocols sama sa pagsul-ob og facemask, face shield ug personal air purifier.

Ang mga kan-anan ug tourist vehicles kinahanglan nga mosunod sa health protocols sama sa air purification system nga adunay high efficiency particulate air (HEPA) filter ug ionizer.

Ang kapasidad sa purification system kinahanglan proportional sa gidak-on sa kan-anan o sa sakyanan. /GMR (BANATNEWS)