Usa nalang ka kaso ang nahibilin sa Daanbantayan
CEBU, Philippines — Usa na lang ang active case sa coronavirus disease sa lungsod sa Daanbantayan kini human nga naayo na ang 16 ka mga pasyente sa lungsod.
Sa Municipality of Daanbantayan Facebook page gipahibalo nga ang pinakabag-o nga naayo sa Covid-19 sa lungsod mao ang ika-16 ug ika-17 nga pasyente nga usa ka walo ka bulan nga bata.
Ang nahabilin nga active case sa Daanbantayan mao ang 30- anyos nga lalaki nga taga Barangay Poblacion. Asymptomatic ang maong pasyente nga kasamtangang gi-isolate karon.
Didto sa lungsod sa Oslob, wala nay active case sa COVID-19 human nga naka-recover na ang siyam (9) ka mga indibidwal nga unang natakdan.
Samtang 26 ang nakarekuber sa Dakbayan sa Talisay apan adunay
12 ka bag-ong natala nga kaso ug way natala nga nakabsan sa kinabuhi kagahapong adlawa.
Ang mga bag-ong kaso nagagikan sa Barangay San Roque, Lagtang, Linao ingon man tagsa gikan sa Barangay San Isidro, Cansojong, Dumlog, Tabunok, Jaclupan ug Lawaan 1.
Sa kinatibuk-an miabot na sa 651 ang kaso sa Talisay. Apan ang nakarekuber niini nagsaka na sa 391. Ang aktibong kaso sa covid-19 sa siyudad naa lang sa 186.
Sa pikas bahin, 224 na usab ang bag-ong natala sa Central Visayas niadtong Hulyo 22 gikan sa 2, 063 nga laboratory result nga nigawas niadtong adlawa.
Sa mga bag-ong kaso, 76 niini ang Cebu City, 25 sa Mandaue City, 32 sa Lapu-Lapu City, 87 sa Cebu Province, 3 sa Negros Oriental ug usa sa Bohol.
Kini ang hinungdan nga ang active cases anaa na sa 7, 069 kun diin 2, 613 ang anaa sa tambalanan ug 4, 456 ang naa sa isolation. Anaa na usab sa 6, 656 ang naka-recover ug 706 ang namatay.
Sumala sa DOH-7 nga posible pa mausab ang figures human sa validation sa mga health personnel ug health offices. Le Phyllis F. Antojado/IBM (BANATNEWS)
- Latest
