Pamutol sa kahoy sa bag-ong sementeryo paminusan

CEBU, Philippines — Gimanduan ni Environment Secretary Roy Cimatu ang mga opisyal sa Cebu City Hall nga minusan ang pagpamutol sa kahoy kun ipadayon ang plano nga pagbukas og laing public cemetery.

Kini sa tuyo nga ang paggamit sa bakanteng luna sa kagamhanan sa siyudad sa bukirang barangay isip burial site dili makahimo og dakung kadaut sa kalikupan.

Si City Legal Officer Rey Gealon kinsa kasamtangang tigpamaba ni Mayor Edgardo Labella nitug-an nga ang public cemetery sa Barangay Sapangdaku tawgon og Cebu City Botanical Memorial Garden.

Ang bag-ong public cemetery alang kini sa mga residente sa Siyudad sa Sugbo ilabi na kadtong mga mamatay tungod sa coronavirus disease.

Giinspeksiyon na ni Secretary Cimatu ug Mayor Labella ang lugar niadtong Lunes.

Kuyog kanila sila si Konsehal Dave Tumulak, Gen. Mel Feliciano kinsa Deputy Overseer for the Visayas ug ubang department heads sa kagamhanan sa siyudad.

Si Gealon nipahibawo nga ang ordinansahon sa maong proyekto naaprubahan na sa konseho sa siyudad sa first reading. Ang siyudad niila sa Sitio Patayng Yuta ug Baksan sa Barangay Sapangdaku isip bag-ong burial site.

Sumala pa ni Gealon nga ang komunidad sa dapit nikooperar ra sa pagpatuman sa maong proyekto. Si Labella ni-certify sa proyekto nga urgent ug nanghinaut kini nga ang cemetery project makakuha sa mga gikinahanglang rekisitos aron masugdan na ang development. Ang luna dunay gilapdon nga duha ka ektarya ug mapalapdan pa.

Ang pagtukod sa sementeryo tubag kini sa problema nga gisagubang sa siyudad sa mga sam-ang nga puno na tungod sa nangamatay sa COVID-19. Decemay P. Padilla/GMR (BANATNEWS)