Kapolisan, simbahan nihatag og dugang tabang sa mga kabus
CEBU, Philippines — Dugang hinabang ang gi apod apod sa kapolisan ngadto sa mga kabus nga molopyo diha sa Dakbayan sa Lapu-Lapu.
Ang mga polis sa Presinto 2 nga gipanguluhan ni Police Corporal Diseree Jadol sa community relations mao ang mipadangat sa maong mga hinabang niadtong Lunes nga gikuyogan usab ni Konsehal Zandro Augusto sa Barangay Mactan kinsa sakop sa advisory council sa kapolisan.
Lakip sa barangay nga nakadawat og mga relief packs mao ang Sitio Maasin, Barangay Mactan sa Dakbayan sa Lapu-Lapu.
Sa nasayran ang maong mga hinabang gipalit pinaagi sa pag tampo tampo sa kapolisan gikan sa ilang nadawat nga hazard pay.
Matud pa ni Jadol nga ilang napili ang maong dapit nga ilang hatagan sa mga relief pack dihang ilang gihimo ang foot patrol niadtong Hulyo 17, 2020 ug ilang nasuta nga daghang kabus nga mga pamilya ang nagpuyo sa maong dapit.
“Nadiskrobrehan namo sa maong pagpatrolya nga daghan nga nagpuyo, apan Dili mailhan kay nasalipdan man sa dakung pader sa usa ka pribadong luna,” suma pa ni Jadol.
Feeding program
Nagpadayon karon ang feeding program nga gipasiugdahan sa Archdiocese of Cebu uban ang Commission on the Laity ug Cebu Caritas Inc. nga gisugdan niadtong Hunyo 21, 2020 sa 14 ka sitio sa Alaska Mambaling
Ang feeding gipahigayon sa Sitio Huyong-huyong, puntod 1 ug 2, Lawis, Ipil-ipil, Abbya, Wangyu, Pagatpat, Alaska Centro, Alaska Proper, San Juan, 2 ka community sa Badjao, ug Tinabangay.
Ang COL ug CCI igo ra mohatod ug supply sa feeding sa maong mga sitio ug ang mga residente sa lugar mao na ang magtinabangay alang sa pagpakaon sa kabataan lakip usab sa mga dagko.
Matud pa sa Chairman sa Commission on the Laity Fe Mantuhac-Barino, nga nagpadayon sila sa maong feeding tungod kay padayon nga nasinate sa katawhan ang kagutom ilabi na niadtong mga lugar nga gi lockdown. Rowena Capistrano/ MEL (BANATNEWS)
- Latest