COVID-19 update: Barangay official nakalas sa COVID-19
CEBU, Philippines — Ang 66- anyos nga opisyal sa Barangay Calero sa Lungsod sa Liloan giingong nakabsan sa kinabuhi tungod novel coronavirus 2019.
Base sa advisory nga gipagawas sa kagamhanan sa maong lungsod ang maong barangay opisyal namatay niadtong Hulyo 18 samtang nagpa-admit kini sa usa ka pribadong tambalanan.
Hinuon daan na kining naghambing og sakit sa kasingkasing maong gidala kini sa tambalanan.
Sa gipagawas nga datos sa Liloan COVID 19 Operations Center alas 8 sa gabii niadtong Domingo Hulyo 19, 2020 ang lungsod adunay natala nga 88 ka kompirmadong kaso, 58 ang naka-recover ug 14 ang namatay. Naglakip sa labing bag-o nga recoveries mao ang medical front liners nga nagtrabaho sa hospital sa Dakbayan sa Mandaue ug Lapu-Lapu.
Ning bag-o, adunay unom ka bag-ong kaso nga naglakip sa usa ka 69- anyos nga cancer patient nga taga Barangay Poblacion nga kasamtangang nag chemotherapy .
Sa Talisay City, 23 ka mga bag-ong kaso sa COVID-19 ang natala gikan sa pito ngadto sa napulo ka kaso sa nanglabay nga mga adlaw.
Apan sa Facebook post sa City of Talisay Public Information Office giingon nga ang pagsaka sa kaso resulta sa subsob nga contact tracing. Sa 23 nga bag-ong natala, ang duha niini nitaliwan na.
Ang mga kaso gikan sa Barangay Pooc nga adunay lima ka kaso, tag tulo sa Barangay Dumlog, Lawaan 1 ug Linao, tag duha sa San Isidro, Lagtang, Candulawan ug Bulacao samtang usa sa Barangay Cansojong.
Central Visayas
Anaa na sa 13, 677 ang total confirmed cases sa coronavirus disease (COVID-19) sa tibuok Central Visayas human nga 240 ka bag-ong kaso ang natala niadtong Hulyo 19, 2020.
Sa report sa Department of Health (DOH-7), ang mga bag-ong kaso, natala sa Cebu City (86), Mandaue City (45), Lapu-Lapu City (42), Cebu City (65) ug Bohol (2).
Tungod niini anaa na sa 6, 872 ang active cases sa Central Visayas samtang 6, 139 ang naka-recover na og 666 ang namatay. Sa mga active cases, 2, 525 an na-admit ug 4, 347 usab ang anaa sa isolation sumala sa DOH-7. Gabriel Bonjoc ug Le Phyllis F. Antojado/IBM (BANATNEWS)
- Latest