Contact tracing di tokhang

CEBU, Philippines — Giklaro sa Police Regional Office 7 nga ang gihimong house-to-house visits pagsusi sa mga tawong posible nga nakauban sa mga nagpositibo sa novel coronavirus (COVID19) dili sama sa programang Toktok Hangyo o Tokhang.

Wala mahimuot si PRO7 Director Police Brigadier General Albert Ferro sa pagtandi sa house to house nga contact tracing ngadto sa Tokhang.

Gipasabot ni Ferro nga dili sila moadto sa kabalayan kung wala silay basihanan. Mobase sila sa mga impormasyon nga ilang makuha gikan sa mga nagpositibo sa COVID19.

“It is being exaggerated that it’s like a Tokhang, no. It will be a simple interviewing of concerns, because we will not go to the houses if we have no basis that these people have been engaged with the positive or confirmed individual. People have their own opinions and I respect their opinions but this is for the good of the majority,” matud pa ni Ferro.

Ang programa sa kapolisan nga Tokhang mao ang pagbisita sa pinuy-anan sa mga notadong mga tiggamitan og ilegal nga drugas aron hangyuon sa paghunong na sa maong bisyo ug pagtahan sa ilang kaugalingon. Mipasidaan si Ferro sa publiko nga mokooperar sa mga contact tracers kay kadtong magmagahi mahimong pakasaan nila og kasong paglapas  sa Republic Act 11332.

Sumala pa ni Ferro, bisan pa man sa mga pagsaway sa mga wala makauyon sa pamaagi sa contact tracing ipadayon nila kini.

Gipasalig niya nga ang mga gipang trace ilahang proteksyonan batok sa diskriminasyon.

Matud niya dili kinahanglang mahadlok ang publiko sa ilang pagbisita sa mga balay tungod kay kauban nila ang mga health personnel gikan sa Cebu City Health Department (CCHD), sundalo lakip na mga analysts ug interviewers nga sibilyan.

Gitinguha sa kapolisan nga pinaagi sa pagbuwag dayon sa mga tawong nagpositibo sa COVID-19, --asymptomatic man ug kadtong duna nay gipakitang sintomas, gikan sa komunidad maputol na kining pagkatap pa sa virus. /IBM (BANATNEWS)