Talisay padayong mopatuman sa estriktong protocols
CEBU, Philippines — Magpadayon ang estrikto nga pagpatuman sa safety protocols sa Dakbayan sa Talisay samtang gipaubos gihapon kini sa general community quarantine (GCQ).
Si Mayor Gerald Anthony “Samsam” Gullas Jr. nagkanayon nga padayon ang kapolisan ingon man ang mga sundalo sa pagsuroy diha sa nagkadaiyang lugar sa siyudad aron masiguro nga ang katawhan padayon nga magsunod sa guidelines.
Si Police Major Gerard Ace Pelare, hepe sa Talisay City Police Station nitataw nga padayon ang “one entrance ug one exit” sa mga sakyanan diha sa South Road Properties (SRP) samtang nisira sa ilang border ang Dakbayan sa Sugbo habig sa Natalio Bacalso sa Barangay Bulacao.
Matud ni Pelare nga padayon ang ilang mga checkpoint diha sa mga lugar sa Talisay.
Ang mga madakpan nga nakalapas sa safety protocols itanggong diha sa basketball gym sa Barangay Tapul nga gibanabanang adunay gilay-on nga 12 kilometros gikan sa sentro sa siyudad. /BDB (BANATNEWS)
- Latest