Pamilya, bisita gidakop atol sa drug bust
CEBU, Philippines — Walo ka mga tawo ang nasikop sa mga tinugyanan sa Philippine Drug Enforcement Unit atol sa ilang gipahigayon nga buy bust operation sa may Barangay Basak San Nicolas ning Dakbayan sa Sugbo, Miyerkules sa gabii.
Ang mga nasikop mao ang subject sa operasyon nga si Ulysses Tradio, 50, nga usa ka mananagat apan nagpadagan og drug den sa lugar, Roselyn Roda, 39 , kapuyo niini, John Tradio, 21 nga anak sa subject. Gidakop sab sa mga operatiba ang mga bisita sa drug den nga sila si Jay-ar Trasmonte, 25; Sammy Dela Peña, 37; Jade Desoyo, 49; James Pacres, 22; ug Lemuel Aldave, 40.
Nasakmit gikan sa mga dinakpan ang 34 ka putos sa gituohang shabu nga motimbang og 17 gramos nga mobalor og dul-an P116 mil, buy bust money, drug paraphernalia, kwarta nga mobalor og P320 nga gituohang halin.
Matud pa ni Leia Albiar Alcantara, tigpamaba sa PDEA-7, nakadawat ang ilang team og impormasyon nga ang amahang Tradio namaligya og shabu sa lugar hinungdan gihimo ang case build-up sulod sa tulo ka adlaw ug dihang nakompirmar ang impormasyon gilusad dayon ang operasyon.
Sumala pa ni Alcantara, ang subject makadispatsar og 100 gramos matag semana. Ang mga dinakpan pasakaan og kaso nga kalapasan sa RA 9165. /IBM (BANATNEWS)
- Latest
